LSI në koalicion paraelektoral me PD-në?

Pasditen e së hënës, PD-ja mblodhi drejtues të lartë të saj dhe kryetarët e degëve të kësaj force politike, për organizimin e zgjedhjeve të 23 qershorit. Pas takimit që zgjati mbi tre orë, Berisha tha për mediat se mbledhja ishte tërësisht për çështje të brendshme organizative të kësaj force politike. Berisha zbuloi vetëm një detaj të fushatës së demokratëve në 23 qershor – do të synohet të fitohet si në bashkinë e Tiranës në 8 maj të 2011-ës.

“Takimi ishte me karakter teknik dhe organizativ për të gjitha degët. Në epiqendër ishte programi i përdorur për fitoren në Tiranë në 2011. Programi që përmbysi murin e bashkisë do të shembë edhe murin e bllokimit”, deklaroi Berisha.

Por në 2011-ën, një ndihmë të madhe kandidatit të PD-së në Tiranë, përveç KQZ-së, i dha LSI-ja, e cila mori 24 mijë vota në këtë bashki. Katër vjet më parë, në 2007-ën, kur LSI-ja përkrahu Edi Ramën, kandidati i PD-së humbi me 22 mijë vota disavantazh…

Siç duket Berisha shpreson ta ketë LSI-në përsëri në koalicion, si në 2011-ën, pavarsisht se eksponentët e saj deklarojnë të kundërtën.

E.Zaloshnja