Kryeministria dhe Presidenca kanë zeruar informacionin nga sajtet zyrtare?

Para pak ditësh, m’u desh të verifikoja një citat, nga një fjalim i paradokohshëm i ish-kryeministrit S.Berisha, të cilin e kisha nxjerrë nga faqja online e Këshillit të Ministrave. Për habinë time, lidhja që kisha më çoi te një 404 not found. Për të qenë më të saktë, faqja e vjetër nuk përmban më asgjë; ndërsa qeveria i ka dhënë vetes një faqe të re; e cila nga emri duket sikur i është kushtuar ndërtesës, jo institucionit. Gjithsesi, emri nuk ka rëndësi; përkundrazi, vijueshmëria institucionale e cenuar ka, madje shumë – sa kohë që asgjë në këtë faqe nuk dëshmon se qeveria e tanishme vjen në vijim të ligjshëm të një qeverie tjetër, e cila funksiononte, me mënyrat, meritat dhe mangësitë e veta, deri në fillim të shtatorit 2013 - shkruan Ardian Vehbiu në blogun e tij.

Seksioni i fjalimeve në sajtin e tanishëm përmban vetëm tre të tilla nga E. Rama; ndërsa seksioni “blog” të çon te http://www.edirama.al, çfarë duhet të jetë blogu i kryetarit të PS-së Rama, jo i kryeministrit, po të gjykosh nga materialet që përmban.

Shkruan Vehbiu: Për fat të keq, e njëjta gjë ka ndodhur edhe me faqen e Presidentit të Republikës: www.president.al; lidhjet drejt materialeve më të vjetra, p.sh. fjalimeve të presidentëve të mëparshëm, përfshi këtu e B. Topin, nuk funksionojnë më – në një kohë që faqja përmban material të bollshëm deri edhe për zonjën e parë. Meqë magazinimi sot nuk kushton pothuajse asgjë, nuk do të kenë qenë arsyet financiare për këtë zerim që u është bërë sajteve të tilla qendrore; dhe këputja e vijueshmërisë tradhton një mendësi revolucionare, prej uzurpatori, që kërkon me ngulm t’i nisë gjërat nga A-ja ose nga zeroja. a.n.