Kryeministri: “Nëse do të instalojmë matësa inteligjentë për energjinë elektrike në të gjithë vendin, ato nuk do të blihen nga konsumatorët”

Kryeministri i vendit ka premtuar sot në studion e “Opinion” se nëse qeveria do të kalojë në operacionin e pajisjes me matësa inteligjentë për energjinë elektrike, ato nuk do të paguhen nga konsumatorët. Kryeministri ka sjellë si shembull krahasues kasat fiskale, të cilat iu shitën bizneseve dhe sipas tij u detyruan edhe të paguanin mirëmbajtjen. Për matësat inteligjentë, ai tha se do të instalohen, nëse faza pilot e 10 mijë matësave, që financohen nga Deutsche Telekom rezulton e suksesshme. Nëse kjo do të vlerësohet si përvojë pozitive dhe nëse reforma në sistemin e energjetik do ta kthejë atë në fitimprurës, atëherë do të instalohen 1.1 milionë matësa, kostoja e të cilëve arrin qindra milionë euro. Kjo është një pikë që do të duhet të verifikohet, por duke qenë se qeveria ka lajmëruar riprivatizimin e menaxhimit të OSHEE-së, nuk përjashtohet që kjo vlerë t’i ngarkohet atij që do të fitojë tenderin. Tërheq vëmendjen vlerësimi i kryeministrit për DT në këtë fushë, që krahas përfshirjes së saj në operacionin pilot, e bën kompaninë gjermane një pretendente potenciale për ofrimin e këtij shërbimi edhe në plan të përgjithshëm.
s.z