Kryeinspektorja e arsimit padit kreun e “Vitrinave” dhe sqaron historinë e diplomës falso

Pas disa fletushkave të shpërndara nëpër Tiranë, më në fund ka reaguar Ejona Isufaj, kryeinspektorja e Ministrisë së Arsimit dhe Sporteve në kontrollin e universiteteve të pezulluara. Ajo ka paditur sot pesë persona, mes tyre edhe dy deputetë të PD-së, për akuzat se e ka false diplomën e doktoraturës. Të paditurit janë Genc Pollo e Luciano Boçi, deputetë, si dhe Edmond Vlashaj, Aldorin Braho e Pirro Çipo, këta të fundit drejtor, administrator e pedagog në Universitetin ‘Vitrina’.

Isufaj ka sqaruar se mbi të është hedhur baltë pa të drejtë, duke sqaruar çështjen e doktoraturës së saj. 
“Unë kam studjuar në Universitetin e Sienës, (ndër Universitetet më të mira të Italisë ) dhe jam shumë krenare për arritjet e mia”, tha Isufaj, duke shtuar se në vitin 2005, unë si shumë qytetarë të tjerë të Shqipërisë (ndër ta dhe personalitete të njohura) u regjistrua në një institut për studime pasuniversitare. Por kur tentoi të njehsojë diplomën mori vesh që ky institut nuk njihej nga shteti shqiptar. “Unë sot i kuptoj më mirë se kushdo tjetër 6000 studentët e Institucioneve të Arsimit të Lartë që humbën licencën. Vetë ata, ashtu si unë dikur, investuan kohën dhe paratë e tyre në një institucion që kryente veprimtarinë në kundërshtim me kuadrin ligjor. Diferenca midis meje dhe këtyre studentëve është se atëherë shteti nuk ishte asgjëkund për të më lajmëruar as për ligjshmërinë e funksionimit, dhe as për ligjshmërinë e mbylljes së institucionit”, tha Isufaj.

a.k