Kryebashkiaku Dako kritikon Berishën dhe e “gjen” zgjidhjen për Qëndrot. Pak si vonë

Është prononcuar edhe kryetari i Bashkisë së Durrësit, Vangjush Dako, pas vdekjes së të moshuarës Sofie Qëndro nga të ftohtët, në barrakën e improvizuar në lulishten e bashkisë. Dako deklaron se bashkia kishte kundërshtuar aktin normativ të qeverisë Berisha dhe se e ka të pamundur t’u ofrojë banesa të gjithë qytetarëve të prekur nga ky akt-vendim. Si zgjidhje për këto familje të nxjerra nga banesat që u kaluan pronarëve të vjetër, Dako përmend banesat sociale të ndërtuara nga një projekt i Bankës Europiane në bashkëpunim dhe me Bashkinë e Durrësit, por shton se numri i kërkesave për strehim është shumë më i madh sesa numri i banesave, ndërkohë që këto familje duhet të plotësojnë disa kritere: Pra, sado që janë shtëpi me qera të ulët, duhet të kesh punë dhe të ardhura për të paguar”.

Dhe duke u kthyer tek tragjedia, Dako thotë se ndaj familjes Qëndro ishin bërë disa oferta por kishin refuzuar. Vetëm sot bashkia e Durrësit ka gjetur një zgjidhje të përkohshme për strehimin e nipit të të ndjerës, Llazi Qëndro. 65 vjeçari do të qëndrojë në qendrën e të moshuarve deri në momentin kur do t’i jepet një garsonierë. Por ngrihen disa pikëpyetje: Sa rezistencë kishin bërë Qëndrot, përderisa tani nipi e pranon ofertën e shtrehimit? Dhe tjetra: nëse jemi mësuar që institucionet tona qëndrore e lokale të ushtrojnë forcën dhe “arbitraritetin” e ligjit, a nuk do të ishte i vetmi rast për t’u duartrokitur, strehimi “me dhunë” i këtyre të moshuarve në një mjedis të mbrojtur, derisa të gjendej garsoniera që tani u gjet kaq kollaj?
a.k