Kryeakademiku i Kosovës mendon që në Historinë e Shqipërisë nuk janë ndriçuar “kryengritjet kosovare” dhe “roli i të huajve”

Në Prishtinë është mbajtur një konferencës dyditore me titull “Pavarësia e Shqipërisë dhe Kosova 100 vjet pas” ku janë mbledhur akademikë e historianë. E përditshmja e Prishtinës “Koha Ditore” raporton se kryetari i Akademisë së Arteve dhe Shkencave të Kosovës, Hivzi Islami i është bashkuar zërave për “rishqyrtimin” e historisë së Shqipërisë. Sipas “Koha Ditore”, “përveç akademik Hivzi Islamit, kërkesën për rishqyrtimin e historisë shqiptare nuk e ka përmendur në fjalën e tij as kryetari i Akademisë së Shkencave të Shqipërisë, Gudar Beqiraj, e as drejtori i Institutit të Historisë në Prishtinë, Jusuf Bajraktari”.
Kryeakademiku i Kosovës mendon se në historinë e Shqipërisë “kanë mbetur pa u ndriçuar shkencërisht në shkallën e nevojshme proceset që i paraprinë aktit të pavarësisë së Shqipërisë”. Për çfarë e ka konkretisht fjalën? “Nuk janë ndriçuar sa duhet kryengritjet e shqiptarëve të Kosovës dhe të trojeve të tjera etnike si ngjarje të cilat i hapën rrugë dhe e përshpejtuan pavarësinë e Shqipërisë. Nuk u studiua sa duhet as qëndrimi i fuqive të mëdha ndaj çështjes shqiptare para dhe pas pavarësisë së Shqipërisë”, - citojnë mediat kosovare kreun e ASHAK-ut.
Kurse akademiku tjetër i Prishtinës, Jusuf Bajraktari ka fokusuar në fjalën e tij përfshirjen e Kosovës në procesin e shpalljes së pavarësisë së Shqipërisë më 28 Nëntor 1912. Sipas tij, “në veçanti duhet vlerësuar besnikëria e luftëtarëve kosovarë” në këto zhvillime të nëntorit 1912 në Shqipëri. – A.N.