Kreshniku kundërgodet Saliun dhe nuk harron Fatosin, Enverin, Ahmetin, Esadin…

Në një editorial të sotëm në gazetën Tema, Kreshnik Spahiu i Aleancës Kuqezi i jep një kundërgoditje të fortë Sali Berishës, i cili u fut së fundi në “ringun e patriotizmit”.

Shkruan Kreshniku për Saliun: “Tani flet për Prevezën, por më parë u ka dhënë grekëve detin, u ka dhënë varrezat, censusin me baza etniko fetare, ndryshimin e kombësive të mijëra shqiptarëve në grekë, emërimin e 3 ministrave nga minoriteti grek….Serbët janë në pozitat më komode në 8 vitet e qeverisjes së Berishës; biznesi serb ka lulëzuar në Tiranë. Ditën [Saliu] flet e çirret për kombin, e me vepra bllokon çdo nismë për bashkim. Ai bllokoi personalisht interkonjeksionin me Kosovën, duke lënë 500 milionë euro në dorë të biznesit serb. Luftëtari i madh antikorrupsion, akuzon bankat gjermane [që do të financojnë linjën e interkonjeksionit] për korrupsion!!!!”

Por Kreshniku nuk mjaftohet vetëm me kundërgoditjen ndaj Saliut. Ai godet edhe paraardhësit e tij në lidhje me “patriotizmin” e tyre. Shkruan për ta ai:

“Sali Berisha, ky patriot part-time, nuk është i vetmi. Edhe kryeministri para tij, Fatos Nano, puthej me Milloshevicin dhe fshinte lot për Kosovën. Ishte ai që u kërkonte shqiptarëve në Kosovë të shihnin Beogradin si kryeqytet. Dhe në atë kohë, Berisha çirrej, po ashtu si sot për tradhti kombëtare!!!
Fatkeqësisht ka një histori të tërë të liderëve politikë në Shqipëri që sillen si servilë, qoftë me Beogradin, qoftë me Athinën! Enver Hoxha kishte frikë nga Beogradi dhe letrat e tij për Miladinin tregojnë jo vetëm kompleksin e inferioritetit, por edhe gjurmët e tradhtisë. Për pushtet personal Hoxha e shiti Kosovën. Më pas lëshonte lot krokodili. Për pushtet personal kërceu sa nga Beogradi në Moskë e deri në Pekin.
Për pushtet personal, Ahmet Zogu firmosi me Pashicin, për t’u kthyer në fron. Eshtrat e Esad Toptanit janë edhe sot në varreza serbe…”

Nga kjo breshëri shumëdrejtimshe e Kreshnikut, duket qartë se Aleanca Kuqezi po synon vota “përtej së majtës e të djathtës”, ose ndryshe, vota të zhgënjyerish edhe nga e djathta edhe nga e majta…
E.Zaloshnja

Artikulli i plotë: http://www.gazetatema.net/web/2012/12/02/balta-e-67-mije-km-...