Kreshnik Spahiu u kërkon të vetëve të grisin flamujt e PD në bizneset që iu fshihen tatim-taksave

“Sot flamuri i partisë së shtetasit Sali Berisha përdoret për t’u fshehur ndaj tatimeve, taksave dhe për të mbaruar ndërtimet pa leje në Durrës, Tiranë, Fier, Vlorë, Korçë dhe kudo ku mafia shtetërore ka vënë dorë për të përfituar materialisht mbi interesat kombëtare të shqiptarëve”, deklaroi Spahiu sot në Durrës, ku Aleanca KuqeZi ka vijuar fushatën “Një flamur për çdo dritare” në kuadër të 100 vjetorit të pavarësisë së Shqipërisë. Dhjetra aktivistë të Aleancës KuqeZi dega Durrës vendosën në dritaret e qytetit të lashtë flamuj kombëtarë duke finalizuar në këtë mënyrë një tjetër qytet kuqezi.

Kryetari i AK Z.Kreshnik Spahiu u ka thënë mbështetësve: “Grisni flamurët e PD në ndërtimet që bëhen pa leje! Po përëndon koha e mafias bardh-e-blu”, citon agjensia “Lajmi Fundit”.

Kreu i lëvizjes politike kuqezi i ka bërë thirrje qytetarëve të Shqipërisë të largojnë dhe grisin flamujt e PD që janë ngritur në çdo biznes të paligjshëm dhe t’i zëvendësojnë ato më flamuj kombëtarë për t’i rikthyer krenarinë simboleve kombëtare.

“Kjo nuk është Shqipëria e shqiptarëve, kjo është Shqipëria e Sali Berishës, ne do t’i kthejmë shqiptarëve Shqipërinë e tyre dhe kjo tashmë është një rrugë pa kthim dhe e sigurt”, përfundoi fjalën Kreshnik Spahiu.

k.c.