Krasniqi: Zogu një mik i boshtit serbo-grek, Enver Hoxha nuk mund të bënte më shumë për Kosovën

Eshtë krijuar përshtypja se politika në Prishtinë dhe qeveria në Tiranë janë zakonisht në unison, por nuk dukej kështu mbrëmë nëse dëgjoje bisedën televizive të kreut të Kuvendit të Kosovës Jakup Krasniqi me gazetaren Rudina Xhunga. Duke folur për Ahmet Zogun dhe Enver Hoxhen, Kraniqi shfaqi mendime diametralisht të kundërta me Tiranën zyrtare.

Tha Krasniqi për Zogun: "Faktet ndonjëherë janë kokëforta.. Unë jam i bindur se mbi gjithë atë që kam lexuar dhe analizuar, edhe gjatë këtij viti, për atë periudhë jam i bindur se janë figura të tjera ato që kanë krijuar dhe mundësuar shpalljen e pavarësisë dhe krijimin e shtetit shqiptar... E keqja është se gjatë këtyre 100 viteve shpesh herë më lehtë kemi biseduar me armiqtë tanë sesa me njerëzit tanë të brendshëm që kanë qenë dashamirës të kombit. Unë po marr një shembull, Ahmet Zogu ka biseduar më shumë me palën serbe dhe greke si dy shtetet më armiqësorë ndaj Shqipërisë dhe shqiptarëve dhe nuk ka krijuar miqësi me Luigj Gurakuqin, Hasan Prishtinën dhe figura të tjera të rëndësishme kombëtare. Ne duhet ta dimë këtë jo për të mbetur në labirinthet e atyre viteve por për të mos i ndjekur ato labirinthe".

Kurse për Enver Hoxhën ai thotë se nuk mundej të bënte më shumë për Kosovën për shkak të rrethanave pas luftës. "Lufta Nacional Clirimtare natyrisht ka rëndësinë e vetë pasi ishte një rreshtim në krahun e luftës anti-fashiste dhe kjo i ka dhënë një rëndësi, - tha Krasniqi duke shtuar për kufijtë Shqipëri-Kosovë: "Konjukturat e kësaj kohe ishin të atilla që nuk mund të ndryshohej. Ndoshta vitet e Luftës së Dytë Botërore, edhe pas saj, kanë qenë vite që udhëheqja e kohës është dashur të kujdeset për ruajtjen e atyre kufijve që ishin caktuar dhe që i kishin gjetur. Edhe këtë e kam trajtuar për faktin se është një temë që rezistenca pas Luftës së Dytë Botërore ka qenë e zhvilluar në Drenicë, në trevën prej nga unë jam, por konjukturat ndërkombëtare kanë qenë të tilla që edhe pse ne kemi luftuar për t’u shkëputur nga Jugosllavia e re që doli  nga L2B, kanë qenë të tilla që shqiptarët kanë mundur të humbin më shumë por jo të fitojnë më shumë". (A.N.)