Korça dhe Basha sipas Mustafa Nanos. Fiks Fare dhe media, sipas Mero Bazes

Duke komentuar pamjet filmike mbi një grup studentësh që u paguhej udhëtimi drejt Korcës për të votuar kandidatin e PS-së, Mustafa Nano dhe Mero Baze merren i pari me standartin e zgjedhjeve dhe i dyti me pyetjen pse TCH ka vendour të transmetojë pamjet në fjalë.

Shkruan Nano në Zululandin e tij në DITA:

"Pamjet që pamë nuk kanë lidhje gjithsesi me standardin europian (askund në Europë nuk bëhen pagesa të tilla në stil skuthash). Ashtu si nuk ka lidhje me këtë standard përgatitja e një liste studentësh që do paguheshin veç pasi të tregonin si provë gishtin e madh të ngjyer me bojë. Nuk ka lidhje me këtë standard as reagimi 24 orë me vonesë i Degës së PS së Korçës. Kjo e fundit, apo kandidati socialist për kreun e Bashkisë së Korçës, apo ish kryetari i Bashkisë, apo PS-ja në qendër, apo vetë kryeministri Rama, duhej ta kishin thënë të tyren menjëherë pas denoncimit të bërë në ‘Fiks Fare’. Në respekt të publikut. Në fund, një saktësim. Kjo ngjarje ishte e shëmtuar për ata që në kokë kanë një standard elektoral europian, por jo për Bashën e të vetët. Sikur të kishim si pikë referimi banditizmin elektoral të tipit “Ristani’, nuk do duhej ta hapnim fare gojën. Do duhej të ishim shumë të kënaqur, madje..."

Shkruan Baze në TemA Online:

Ajo që bëri “Fiks Fare” është një punë e zakonshme gazetareske që duhet ta bëjë secili nga ne. Ato media që heshtën për manipulimet e zgjedhjeve në Shqipëri nga Sali Berisha, ata që quajnë triumf fitoren e Lulëzim Bashës me vota të vjedhura, ata që nuk mbronin as gazetarët e tyre që vriteshin nga plumbat e Sali Berishës, nuk duhen ngatërruar më me median, por me një pirg plehrash që duhet ta konsiderojmë se duhet të zhduken nga media pas 23 qershorit, së paku si model.

Ajo që bëri “Fiks Fare” nuk është ndonjë heroizëm, por një lajm normal. Fakti që na duket heroizëm, tregon sa poshtë kemi rënë. a.n.