Kolegji i thotë “jo” lojës së hapjes së kutive; zgjedhjet quhen të mbyllura

Socialistët kanë bërë ankimim në Kolegjin Zgjedhor, me anë të të cilit kanë kërkuar të anulohet, e të njihet si i paligjshëm, vendimi i KQZ-së për të rihapur të gjitha kutitë në qarkun e Lezhës e të Shkodrës (vendimi u mor me katër vota, në një kohë që, sipas kodit zgjedhor, duhet marrë me pesë). Dhe Kolegji ka rënë dakord me logjikën e socialistëve. Ata kanë marrë një vendim, me anë të të cilit e shpallin të paligjshëm vendimin e KQZ-së. Pas kësaj, duhet të ndërpritet rinumërimi i Shkodrës (që po ndodhte gjatë këtyre orëve), dhe konsiderohet nul rinumërrimi i Lezhës.

“Kolegji, në ndryshim nga KQZ, e lexoi ligjin ashtu siç ligjvënësi e ka shkruar. Ky vendim ka efekt automatik edhe për qarkun e Shkodrës. Vendimet kanë qenë haptas në kundërshtim me ligjin. Nuk ka nevojë të jesh jurist për të kuptuar këtë gjë. KQZ verbërisht, e urdhëruar politikisht, e ka futur këtë proces në një qorrsokak, që u zgjidh për fat të mirë nga Kolegji, duke kthyer ligjshmërinë në KQZ”, tha Koli Bele, përfaqësuesi ligjor i PS-së.

Kurse përfaqësuesi i PD-së, Oerd Bylykashi, sulmoi ashpër Kolegjin Zgjedhor, duke thënë se është minuar procesi ankimor.

“Është një vendim i paprecedent. Është vendim i gjykatës dhe ata kanë të drejtën e tyre, [por] është një vendim që minon procesin ankimor sepse anulon mundësitë e çdo pale të ankimojë në kushtet e bllokimit të KQZ pas largimit të anëtarëve të majtë. Në sytë e të gjithë shqiptarëve është një vjedhje e hapur me 1200 vota në qarkun e Lezhës dhe ky është një mandat i vjedhur”.

Re.Pu.