Koço Kokëdhima “rrëfen” mëkatet e Zogut, Hoxhës, Berishës, Nanos, Ramës, Metës dhe Bashës

Deputeti i PS-së në Qarkun Vlorë, Koço Kokëdhima, në një intervistë për emisionin “Oktapod” në televizionin “Vizion plus”, flet për jetën, biznesin dhe pushtetin. Kokëdhima rrëfeu detaje shpirtërore dhe shumë jetësore për jetën e tij nga fëmijëria, deri në ditët e sotme, lidhjet e tij me familjen, biznesin dhe politikën, duke dhënë vlerësimin për figura si Zogu, Hoxha, Nano, Berisha, Rama, Meta dhe Basha.

Por cilat janë vlerësimet që ka Kokëdhima?

Për Ahmet Zogun:

-Mëkati më i madh i Ahmet Zogut ishte bashkëpunimi me armiqtë e kombit shqiptar për të ardhur e qëndruar në pushtet dhe shpërblimi i tyre me copa Shqipërie.

Për Enver Hoxhën:

-Enver Hoxha është një figurë shumë komplekse. Vepra e tij ka arritje dhe vlera të mëdha, ashtu siç ka edhe probleme edhe të meta të mëdha. Ai ishte komandanti i Luftës Nacional-Çlirimtare dhe udhëhoqi shumë reforma të suksesshme në Shqipëri, ashtu siç është i anatemuar për zhvillimin ekstrem të luftës së klasave dhe për shumë histori të tjera që kanë lidhje me shkatërrimin e interesit dhe lirive individuale të njeriut. Mëkati më i madh i Enver Hoxhës, në një këndvështrim të caktuar, është fakti që la një vakuum të atillë për të ardhmen dhe drejtimin e këtij vendi, vakuumin që do i sillte këtij populli në krye, për gati një çerek shekulli, të tillë udhëheqës si Sali Berisha dhe Fatos Nano.

Për Sali Berishën:

-Saliu? O Zot sa mëkate ka bërë Saliu!. Ka bërë aq shumë mëkate, sa s’di ç’të përmendësh më parë për Saliun.

Për Fatos Nanon:

-Fatosi nuk është krejt e njëjta histori me Saliun, se Fatosi nuk ka bërë vrasje për të ardhur në pushtet dhe për të mbajtur pushtetin. Këto nuk i ka bërë, por ka bërë plot histori korrupsioni të ndyra dhe histori të tjera që mund t’i përmendim. Ka po aq përgjegjësi sa Saliu, për faktin që Shqipëria nuk ndërtoi dot një sukses të qenësishëm në këtë tranzicion, përkundrazi ka bërë një tranzicion të dështuar dhe për këtë janë përgjegjës Fatosi dhe Saliu. Por sot do t’i kujtoj një mëkat shumë të madh Fatos Nanos. Ky mëkat ka qenë përçarja e së majtës, përçarja e Partisë Socialiste dhe me këtë përçarje ai bëri që Shqipëria të binte përsëri në duart e Sali Berishës dhe të pësonte gjithë këto dëme e gjithë këto shkatërrime që ka pësuar.

Për Edi Ramën dhe Ilir Metën:

-Për Ilirin dhe për Edin do të them që ndajnë një mëkat, në një mënyrë të caktuar, bashkë. Nuk është me rëndësi se sa për qind ka njëri dhe sa për qind ka tjetri, por mëkati më i madh i tyre është që e vonuan bashkimin e së majtës nga 2009- a dhe i dhanë edhe katër vite të tjera jetë në pushtet Sali Berishës.

Për Lulzim Bashën:

-Për Lulzimin do të them që ka tri përgjegjësi të rënda. Çështja me abuzimet e mëdha me rrugën e Kombit, abuzim me pasuri shumë të rëndësishme për popullin shqiptar dhe për ekonominë e Shqipërisë. Ai ka një përgjegjësi shumë të madhe për vrasjet e 21 janarit, sepse ishte ministër i Brendshëm dhe strukturat që kryen vrasjet ishin nën urdhrat e tij. Është përgjegjësi e tij që ta distancojë veten qartazi nga ato vrasje në atë masë që të jetë e qartë për publikun. Por mëkati më i madh i tij, sipas meje, është ulja në karrigen e Kryetarit të Bashkisë me mandatin që vodhi Saliu me Ristanin. Ai do të duhej të uronte fitoren e kundërshtarit të tij dhe jo të ulej vetë në atë karrige.  

Intervista e plotë: http://www.shekulli.com.al/web/p.php?id=48151&kat=87

n.k