Klasa politike mbështet e gjitha ekipin kombëtar. “Incidentet e Beogradit, pasojë e huliganizmit serb”

Klasa politike në Shqipëri është prononcuar e gjitha për ndeshjen e Beogradit. Kryeministri ka folur sot në “Zërin e Amerikës”, duke deklaruar se flamuri në incidente, është një alibi e serbëve për të fshehur urrejtjen e tyre. Ndërkohë Presidenti i Republikës ka pritur përfaqësues të ekipit kombëtar, me të cilët ka ndarë mendimet për ndeshjen e djeshme. “Lojtarët shqiptarë shkuan pa paragjykime si sportistë dhe profesionistë, por u ndeshën me fyerjen e simboleve tona kombëtare, me thirrje shoviniste dhe raciste, me dhunën e huliganëve dhe pjesëtarëve të stafit të sigurisë në stadium, situatë që e përballuan me dinjitet të lartë. Ata rrezikuan shumë në emër të dinjitetit dhe simbolikës që mbartin ngjyrat e flamurit kombëtar si shenjë e identitetit dhe integritetit shqiptar”, ka thënë Nishani. Kështu e gjithë klasa politike ka vlerësuar se incidentet në Beograd janë përgjegjësi e huliganizmit serb dhe paaftësisë së qeverisë serbe për të siguruar mbarëvajtjen e ndeshjes.

s.z