Kim Mehmeti: Rama më ka zhgënjyer; Berisha ka humbur pushtetin mbi veten

Shkrimtari Kim Mehmeti ka dhënë një intervistë të gjatë për të përditshmen e Tiranës shqiptarja.com (vetë ai jeton në Maqedoni), në të cilën flet, mes të tjerash, dhe për Ramën e Berishën. Për Ramën thotë, se e ka mirëpritur ardhjen e tij në politikë, por më pas është zhgënjyer, ngaqë tek Rama ka parë njeriun që vepron sipas parimit ushtarak “qëllimi justifikon mjetin”.  Së fundmi ka parë që “Rama e ka kuptuar këtë gabim”, por e lë të pashpjeguar këtë pohim të vetin.

Lidhur me Berishën, Mehmetit i ka bërë përshtypje premtimi i tij se “do të largohet nga politika ose nga verdikti i zgjedhësve, ose nga verdikti i Zotit”. Sipas Mehmetit, që është kritik me këtë qëndrim të Berishës, “ka pasur politikanë që asnjëherë nuk i kanë humbur zgjedhjet, që kanë qenë më të votuarit, por janë shndërruar në përbindësha, duke gllabëruar dhe të ardhshmen e vendit të tyre”. Berisha duhet të dijë, përfundon publicisti nga Maqedonia, se “sa më gjatë të sundosh mbi të tjerët, aq më shumë e humb pushtetin mbi vetveten”.

Re.Pu.