Kasaj shpallet i pafajshëm, por Tahiri premton se “nuk mbyllet me kaq”

Armando Kasaj, specialisti i IT-së së kryeministrisë që akuzohej nga prokuroia për fshehjen e fshirjen e provave, është shpallur i pafajshëm. Çështjen e ka gjykuar Gerd Hoxha, i cili është shprehur në vendimin përfundimtar se “në kohën që është bërë fshirja e formatimi i të dhënave, nuk provohet që Kasaj të ketë qenë në kryeministri”. Ka reaguar menjëherë, në emër të PS-së, deputeti Saimir Tahiri, i cili e ka quajtur “absurd, skandaloz, të blerë e kriminal” vendimin e marrë “nga një gjyqtar që familjarisht është i lidhur ngushtë me pushtetin politik, dhe madje ngushtësisht me Presidentin e sapozgjedhur”. Tahiri shfaqet i bindur me këtë rast mbi një fund të shkruar e të kopsitur të procesit gjyqësor në ngarkim të të dyshuarve për krimin e 21 janarit të vitit 2011: “Kjo është parathënia edhe për gardistët, dhe për vetë komandantin e Gardës, që akuzohen për vrasjen e 4 protestuesve”. Dhe më tej ai komunikon drejtpërdrejt me Armando Kasajn e me autorët e vrasjeve më 21 janar: “Armando Kasaj, sot mund të jesh liruar nga vendimi i një gjyqtari të kapur me ndihmën e pushtetit të Kryeministrit, shefit tënd. Por mos iu gëzo shumë vendimit. Çmimin që ke për t’i paguar drejtësisë e ligjit nuk do e shmangësh dot kurrën e kurrës. Ky premtim vlen dhe për gardistët dhe komandantin e Gardës. Vlen dhe për gjyqtarin e sotëm e të gjithë gjyqtarët e tjerë, të kapur nga koka te këmbët në korrupsion e shërbim të pushtetit. Vlen për Sali Berishën, Lulzim Bashën, Gjergj Lezhjën e këdo tjetër që nga kontribuar shumë apo pak në vrasjet e 21 janarit”,

Re.Pu.