Ka europianë të rinj që mësojnë… gjuhën shqipe! Dhe ja çfarë mendojnë për të

Është duke u zhvilluar këto ditë një seminar për albanologjinë. Quhet "Seminari Ndërkombëtar i Gjuhës, Letërsisë dhe Kulturës Shqiptare"  dhe mbahet prej 31 vitesh. Këtë vit po zhvillohet në Prishtinë. Radio Europa e Lirë në rubrikën e saj të përjavshme VOX ka intervistuar disa të rinj europianë që janë duke mësuar gjuhën shqipe. Thuajse të gjithë të intervistuarit, pasi japin arsye të ndryshme pse u duhet shqipja, bashkohen në një pikë. Ajo është shumë e vështirë. Ja disa pjesë nga intervistat e tyre:

Sofija Turocu nga Hungaria: “Për mua kjo gjuhë është shumë e vështirë, por në seminar po bëjmë përpjekje për të mësuar më mirë gjuhën, mësoj shumë gramatikë”

Studenti Ukash nga Polonia: “Unë quhem Ukash dhe vij nga Polonia. Që nga fëmijëria ime kam pasur një interesim që të studioj për gjuhët. Gjuha shqipe është shumë e vështirë për polakët”.

Kasna Gajevsak nga Polonia: “Jam në vitin e parë, studioj Filologji Ballkanike dhe i kam drejtimet në shqip dhe bullgarisht. Gramatika e gjuhës shqipe mendoj se është e vështirë”.

Maco Baçninski nga Bullgaria: “Më pëlqen shumë gjuha shqipe, por unë mendoj që është shumë e vështirë, megjithatë po tentoj të mësoj sa më shumë”.

Francis Xhekson nga Britania e Madha:  “Flas gjermanisht, rusisht, gjuhën çeke, frëngjisht dhe kam dëgjuar që në Mynih ka kurse të gjuhës shqipe dhe vendosa të shkoj për ta mësuar shqipen. Nuk është aq e vështirë sa gjuha gjeorgjiane, por është më vështirë se gjuha çeke”.

Premysl Vinsh nga Çekia: “Unë merrem me gjuhën shqipe prej shumë vjetësh, sepse që nga koha e fëmijërisë kam pasur dëshirë të studioj kulturën dhe historinë shqiptare dhe nga kjo arsye kisha nevojë të mësoja gjuhën. Kisha vështirësi, por më lehtë e mësova gjuhën shqipe se për shembull gjuhën angleze”.

Xhovana Nançi nga Italia:  “Unë jam nga Kalabria, qyteti i Kozencës dhe atje kam filluar studimet për gjuhët e huaja. Pastaj kam zgjedhur të mësoj gjuhën shqipe, sepse atje kemi edhe Departamentin e Gjuhës Shqipe në kuadër të studimeve për komunitetin arbëresh, që janë të shumtë në rajonin e Kalabrisë. Kam pasur interes për gjuhën shqipe për letërsinë dhe vazhdova me specializim dhe tash me doktoraturë. Merrem me përkthime nga shqipja në italisht”, tregon Nançi.

Kristian Gashi nga Gjermania: “Babai im është shqiptar, nënën e kam gjermane, por për fat të keq babai im nuk ma ka mësuar gjuhën shqipe dhe për këtë arsye unë jam këtu për të mësuar gjuhën shqipe sa më perfekt, ashtu siç unë e flas gjermanishten. Gramatika e gjuhës shqipe mua më duket shumë e  vështirë”.

(A.N.)