Këshilltari: Sipas llogaritjes së votave më takojnë 17 vende pune (!) Ish-prefekti më ofroi 100 milionë për votën (!)

Një përfaqësues i PDS në Këshillin Bashkiak të Fierit ka shpallur se ka vendosur të dalë si “këshilltar i pavarur”. Sipas një raportimi të së përditshmes “Gazeta Shqiptare” nga Fieri, veprimi i këtij këshilltari (quhet Selman Braçe) ka bërë që raporti mes këshilltarëve të majtë dhe të djathtë të jetë 17 me 17. Dhe ja si i shpjegon arsyet e tij personi në fjalë në intervistën e botuar sot në këtë gazetë:
- S.B: Kur u bë konstituimi i Këshillit Bashkiak kanë qenë 35 këshilltarë. Nga këta, 19 për të majtët dhe 16 për të djathtët. Më pas, një këshilltar i PS-së kaloi me LSI-në dhe raporti shkoi në 18 me 17 po për të majtët. Tashmë, me daljen time si i pavarur raporti është barazim, 17 me 17.
- G.Sh: Si do të votoni konkretisht?
- S.B: Kam garantuar dhe e garantoj elektoratin tim, që do ta jap votën time në interes të tyre. Bashkia e Fierit ka 600 punonjës, përfshi administratën dhe ndërmarrjet në vartësi të saj. Sipas një llogaritjeje, i bie që 17 vende pune duhet t’i ketë PDS-ja, ndërsa faktikisht s’ka asnjë vend pune. Pra s’kanë punësuar asnjërin prej personave që më kanë votuar. Atëherë, përse duhet t’ia jap votën të majtës në Këshillin Bashkiak, kur ata nuk kanë treguar interes për votuesit e mi?!
- A keni pasur oferta nga të djathtët për ta kaluar votën tuaj nga e majta tek të djathtët, në Këshillin Bashkiak?
- Kam pasur oferta me vende pune, me para kesh në dorë. Kam pasur presione deri edhe dhunë fizike, por unë s’mund të tradhtoja besimin e elektoratit tim, të votuesve të mi. Fillimisht më kanë ofruar vende pune si drejtor tek Tatim-Taksat në Fier dhe në një institucion tjetër, ndërkohë që ish-prefekti më afroi 100 milionë lekë të vjetra, që unë të votoja për të djathtët në Këshillin Bashkiak. Këto oferta të pista unë nuk i kam pranuar, por u kam qëndruar besnik forcës politike që unë përfaqësoj dhe votuesve të mi... (!) - A.N.