JAVA: 2 agjentë të një vendi fqinj pjesë e delegacionit që shiti detin!

Revista “Java” publikon një fakt shumë shqetësues: në ekipin që miratoi marrëveshjen e shtjes së detit ka pasur dy agjentë të një vendi fqinj perëndimor. Revista nuk flet me emra konkretë, por vendi nuk është vështirë të imagjinohet se kush është. Çudia është se këta 2 agjentë nuk janë asfare të fshehtë, dhe aq më pak të jenë mjeshtra të pisqollës a të arteve marciale (si agjentët '007' në foton ilustruese). Ata dihet prej vitesh, siç thotë revista, që janë në shërbim të një agjenture të huaj. E çuditshmja është se ata kanë bërë karrierë edhe me të majtët edhe me të djathtët, duke ruajtur në të dy rastet poste shumë të larta.

Ata kanë lëvizur disa herë në sektorë shumë të rëndësishëm të shteti shqiptar duke mbajtur edhe “grada” shumë të larta, madje dhe të emëruar në detyra akoma më të larta prej dy ish-Presidentëve, Moisiu e Topi. Njëri prej tyre e ka një familjar të pozicionuar shumë lart në hierarkinë e shërbimeve inteligjente të një vendi fqinj.

Revista risjell një fakt pak të njohur, që për njërin nga agjentët ka pasur debate të forta mes ish-Presidentit Moisiu dhe Ministrit që ia kish sjellë agjentin për firmë. Por, nuk dihet sesi ajo firmë prapë u hodh.

Sot, të dy agjentët janë përfaqësues së Shqipërisë në përfaqësitë tona jashtë. Një i tretë, zyrtar i dorëhequr para pak muajsh, paska qenë agjent në shërbim të dy agjenturave dhe ka shkaktuar dëme vendit në pozicionin ku ka qenë!

Kjo katrahurë në “hanin” tonë me shumë porta ka bërë që edhe pse nuk është bërë publike, Shqipëria të marrë paralajmërim serioz për pezullim nga Nato para ndonjë viti. Arsyeja: nga Shqipëria rrjedhin informacione sekrete!

Sipas “Java”-s, për sa kohë ne do i hedhim në rrugë njerëzit që i kanë shërbyer vendit në shërbimet tona inteligjente e t'i detyrojmë të emigrojnë për bukën e gojës, është e pritshme që ish-zyrtarët tanë të “cicërojnë” kollaj andej nga ikin. Shkatërrimi i strukturave të kundër-zbulimit pas përmbysjes së komunizmit ishte një naivitet (në rastin më të paktë) që na kushtoi shumë. Për sa kohë punësohen në poste tepër delikate njerëz që kanë kaluar me vite jashtë e që nuk u gjurmohet dot e shkuara, përmirësimi i situatës duket i largët. S'na mbetet të themi veç: Ruajna Zot Naton.

k.c.