Ish-ministri i Brendshëm paralajmëron valë protestash dhe thotë: Edi Ramën do ta bëjmë të ikë nga zyra e tij me vrap

Reagimi i opozitës ndaj vendimeve të qeverisë nuk do të mjaftohet vetëm me deklarata dhe qëndrime kundër të deputetëve të PD-së në Kuvend. Ish-ministri i Brendshëm dhe deputeti demokrat, Flamur Noka paralajmëron se shumë shpejt, PD-ja dhe opozita do të zhvillojnë protestat më të mëdha që janë parë ndonjëherë në vend, të cilat do të çojnë në rrëzimin e Edi Ramës. Në një intervistë për “Koha Jonë”, Noka shprehet se protestat janë një mjet i gjithë opozitave. Por, sipas tij, domosdoshmërinë e tyre e sjellin edhe vendimet e mazhorancës, të cilat po dëmtojnë interesat e qytetarëve. “Protestat janë mjet demokratik, për të reaguar ndaj padrejtësive.

Kjo mazhorancë, me këtë sjellje arrogante dhe mospërfillëse që po demonstron, me vjedhjet, largimet nga puna të specialistëve, me krimin e organizuar që e ka futur në shtet, me mafien që po uzurpon majën e Qeverisë, shumë shpejt do të përballet me protestat më të fuqishme që ka parë ndonjëherë. Ne jemi opozitë e vendosmërisë dhe e forcës së shpirtit, që nuk do të largohemi nga protesta derisa ta rrëzojmë Edi Ramën, pasi ka mashtruar shqiptarët dhe po krijon kultin e tij të rrezikshëm. Ne nuk vendosim çadra para Kryeministrisë si Rama dhe ikim se lodhemi! Ne rrimë aty para tij, para Kryeministrisë e kudo që po bëhen planet e PD-së për ta rrëzuar, me të gjitha mjetet demokratike. Kryeministri Rama nuk e njeh mirë PD-në, ndaj ka nevojë ta mësojë sapo të fillojmë valën e madhe të protestave, të cilat nuk janë parë në Europën Juglindore tash shumë vite. Mbajeni mend; do ta rrëzojmë se ka mashtruar dhe po punon për një taraf të tij personal, por jo për shqiptarët. Do t’a bëjmë të iki nga zyra e tij me vrap! Po përgatitemi!” shprehet Noka.

Intervista e plotë: http://www.kohajone.com/te-ndryshme/item/7365-ish-ministri-i-brendshem-edi-rama-bie-me-protesta.html

k.k