Importimi i nacional-politikës në Shqipëri, copy-paste nga versioni “Orban”

Tek Shqip e ditës së sotme, Ylli Pata bën një analizë të valës së “nacionalizmit” që po kap tërë spektrin politik. Sipas tij, Berishën e kanë këshilluar “spin doctor”-ët e vet për të kaluar në pozita nacionaliste, që ai e konsideron si një aplikim të modelit Orban, kryeminstrit hungarez të shndrruar në një problem për Europën, që ka rikthyer fort tezat nacionaliste dhe që ka ndërruar fjalën “republikë” me “komb”. Një tjetër shembull për të “frymëzuar” Berishën është edhe ai i Gruevskit që po tenton të rrijë në pushtet duke ngritur monumente gjigande që evokojnë të shkuarën maqedonase. Vala e nacionalizmit u iniciua nga AK me rastin e censusit të kontestuar, çka mori reagim pozitiv nga shqiptarët. Më pas kontestimit iu bashkua dhe PDIU, që kërkoi disa amendime të censusit. Nga ana tjetër, Majko hodhi tezën që nacionalizmi mund të jetë i majtë, i përforcuar dhe nga një tur i fuqishëm i Ramës në trevat shqiptare, Kosovë,Preshevë, Maqedoni, po në funksion të kësaj ideje.

Modeli Orban që po tentohet të kopjohet copy-paste nga Kryeministri është shumë i kontestuar nga BE, dhe Hungaria është një nga vendet më problematike për ekonominë e lirinë e shtypit në Bashkim, por, kjo i siguron megjithatë Orbanit vota. 

Loja me "nacionalizmin" po bëhet për elektoratin “gri” me ndjeshmëri kombëtare, por rreziku është që ky elektorat të kapet në kurth, pa iu ofruar premtiem reale për përmirësimin e kushteve të jetesës të zëvendësuara me retorikë nacionaliste. K.C.