Ilir Beqja: Ç'i ka bërë taksa e sheshtë ekonomisë shqiptare

Sekretari për programin në PS, Ilir Beqja, përmes një deklarate për mediat, ka reaguar pas deklaratave të kryeministrit Berisha në mbledhjen e qeverisë lidhur me taksën progresive. Beqja ka shprehur edhe një herë vendosmërinë e PS për taksim të ndershëm, duke bërë një krahasim me degradimin që ka pësuar ekonomia shqiptare në 5 vjet të aplikimit të taksës së sheshtë. “Ku jemi sot pas 5 vjet të taksës së sheshtë, rritja ekonomike është 5 herë më e vogël, borxhi publik është 50 për qind më i lartë se 2008, konsumi i familjeve shqiptare është më i ulëti në 5 vjetët e fundit, kreditë me probleme janë 10 për qind e GDP, ndërkohë që pasuria është përqendruar në gjithnjë e më pak duar”, u shpreh Beqja. Më tej sekretari për programin në PS ritheksoi edhe një herë vendosmërinë e PS në vendosjen e taksës progresive, në mënyrë që ai që fiton më shumë paguan më shumë. Ndërkohë, Beqja theksoi se pjesë shumë e rëndësishme e programit të PS me ardhjen në pushtet është heqja e taksës së biznesit të vogël, që mban në këmbë ekonominë shqiptare dhe haset me vështirësi të panumërta, një nga të cila ajo që Beqja e cilësoi si taksa e korrupsionit, mungesa e rendit dhe qetësisë publike në mjedisin e sipërmarrjes ekonomike. Re.Pu.