A. i Aviacionit Civil/ Feliks Baçi pezullohet si drejtor, kalon zv/drejtor. Në postin e drejtorit, Aleksandër Lipivani. Zëdhënësja: "Nuk ka lidhje me raportin e auditit"

Feliks Baçi, i cili mbante postin e Drejtorit të Autoritetit të Aviacionit Civil ka kaluar së fundmi në postin e zv/drejtorit të këtij autoriteti. Burime nga ResPublica thanë se atij i është kërkuar dorëheqja, por zëdhënësja e Autoritetit të Aviacionit Civil, Eda Gazheli sqaroi për ResPublica se zoti Baçi prej 8 muajsh mbante detyrën e drejtorit të komanduar në Autoritetin e Aviacionit Civil dhe atë të nëndrejtorit, pas dorëheqjes së ish-drejtorit të këtij Autoriteti, Petrit Sulaj. Sipas zëdhënëses së këtij institucioni, Eda Gazheli me vendim të Këshillit të Ministrave të datës 21 Janar, në postin e Drejtorit të Autoritetit të Aviacionit Civil është Aleksandër Lipivani.

Të dy drejtorët, si Petrit Sulaj  i dorëhequr 8 muaj më parë, ashtu dhe Aleksandër Lipivani mësohet se kanë qenë propozime të Lëvizjes Socialiste për Integrim. E pyetur nëse largimi i zotit Baçi  ka të bëjë me përfundimet e nxjerra nga një raport i auditit të brendshëm në Autoritetin e Aviacionit Civil, zëdhënësja Gazheli e mohoi një gjë të tillë dhe tha se si në cdo institucion kur largohet drejtori i Pergjithshem, detyren e merr perkohesisht zv/drejtori. Informacione qarkullojnë edhe për një largim të mundshëm nga detyra të drejtoreshës së Albcontrollit, Belinda Balluku, por mbeten jozyrtare.

l.m