Heqja e Oketës ndryshon votat në Komisionin e Sigurisë

Deputeti i FRD-së, Gazmend Oketa është përjashtuar nga Komisioni i Sigurisë, duke u zëvendësuar me deputetin demokrat, Bedri Hoxha. Deputeti Oketa tha se nuk ka qenë në dijeni të një lëvizje të tillë, por mazhoranca parlamentare e votoi në seancë parlamentare zëvendësimin pa shqetesime.

Tha Oketa gjatë një prononcimi për mediat: "Kuvendi ka humbur seriozitetin. Në Komision diskutohej ligji për Agjencinë e Inteligjencës së Mbrojtjes dhe deklarimi im e nuk do ta mbështesja këtë iniciativë, ka nxitur maxhorancën për të korrigjuar numrat në këtë Komision. Tashmë fatkeqësisht Kuvendi dhe puna e Komisioneve është orientuar në një përplasje numerike dhe jo në një përplasje idesh apo përpjekjesh për të hartuar ligje të mira për qytetarin shqiptar". 

Aktualisht komisioni i sigurisë përbëhet nga 24 anëtarë, 12 të Partisë Demokratike, 11 anëtarë të Partisë Socialiste dhe 1 i pavarur, i cili ishte deputeti Oketa. Me zëvendësimin e tij, anëtarësia në komision është e ndarë përkatësisht 13 me 11 në favor të Partisë Demokratike. A.N.