Harito citon Lagarde-in: Në politikë nuk lipsen gra ‘me testosteron’

‘Kopertinën’ e numrit të sotëm të Shekullit e kish zënë portreti i një gruaje. Quhet Milena Harito. Pas vitit 1990 ka qenë në Francë, ku ka arritur të specializohet në fushën e teknologjive të informacionit dhe komunikimit, dhe të jetë pjesë e operatorit France Telecom. Këto kohë është kthyer në Shqipëri për t’u përfshirë nga ethet e politikës e për t’u bërë pjesë e opozitës. Në intervistën që kish dhënë për gazetën e Kokëdhimës, binte në sy përgjigja lidhur me rolin e femrave në politikë e në jetën publike. “Në shoqërinë tonë jugore-maskiliste [ku ajo, me një koeficient jo të vogël gabimi, fut si Francën, ashtu dhe Shqipërinë] ka ende rrugë për të bërë që burrat të kuptojnë se ç’fitojnë ata vetë nga emancipimi i grave”, thotë ajo fillimisht.

Për të ilustruar qasjet e ndryshme të femrave në jetën politike, ajo kthen sytë nga rasti francez: “Rashida Dati luante fort kartën e seduksionit; Segolene Ruajal, për çdo dështim personal, ishte gati të pozicionohej si viktimë; Simone Veil mbetet një nga figurat më të ekuilibruara dhe serioze të politikës franceze që prej viteve ’70; së fundmi Christine Lagarde, një nga figurat e suksesshme të qeverisë Sarkozy, e ardhur nga bota e biznesit me një kompetencë dhe aftësi politike të vërtetë në administrimin e krizës financiare  botërore që prej vitit 2008”.  

Pyetja është: Po në Shqipëri? [Këtu] një pjesë e grave futen në raporte force si “burra midis burrave”, thotë ajo. Dhe vijon: “Nuk i paragjykoj hiç, sepse padyshim roli publik për një grua është një rol i vështirë në një shoqëri maskiliste si e jona, ku edhe vështrimet janë nganjëherë padurueshmërisht të pacipa, pa folur për gjykimet personale ndaj grave apo fjalorin e rrugëve që ju rezervohet ndonjëherë atyre edhe në nivelet më të larta shtetërore. Por do doja të citoja përsëri Christine Lagarde-in, e cila thotë pak a shumë, se ‘një çikë më pak testosteron e më pak ego personale në drejtimin e  punëve publike është diçka e dobishme për të gjithë’.”

E.G.