Gazetari i njohur i CNN-it, Anderson Cooper bën outing: Po, unë jam gay

Ata që ndjekin (apo janë të infomuar mbi) televizionet amerikane, me siguri e njohin Anderson Cooper-in, gazetarin prej një kohe të gjatë të CNN-it. Ai bëri sot një outing, dmth deklaroi prirjet e veta homoseksuale. E bëri me anë të një email-i dërguar gazetarit, eseistit dhe shkrimtarit të njohur, Andrew Sullivan, britanik me banim në SHBA. Ky i fundit është njëherësh – gjë jo fort e zakontë – katolik, konservator, gay.

Dihej, më saktë flitej, që gazetari Cooper ishte homoseksual, por ai vetë kurrë nuk e kish pohuar në publik. Ndërsa në këtë email ai e pranon se “ka qenë, është e do të jetë gay, dhe është shumë rehat lidhur me këtë fakt”. Ai shpjegon se nuk e ka thënë faqe botës këtë gjë, pasi nuk ka dashur të marrë poza aktivisti e nuk ka menduar se kjo është puna e të tjerëve. “Mirëpo, tani po më duket se njerëzit janë duke menduar se unë jam duke fshehur diçka të sikletshme e të turpshme”, thotë ai duke përligjur këtë outing.

Anderson Cooper bëhet i pesti moderator i televizioneve amerikane që deklarohet gay. Katër të tjerët janë kolegët e CNN-it, Don Lemon dhe Jane Velez-Mitchell, si dhe kolegët e televizionit tjetër, MSNBS, Thomas Roberts e Rachel Maddow.

E.G.