Gazetari i 21 janarit i bën një "analizë fetare" iftarit të Berishës

Fatos Mahmutaj është një nga të plagosurit e 21 janarit. Ish-gazetari i ABC News që pas 21 janarit mori strehim politik dhe jeton në Bruksel, me sa duket është edhe një agjërues i rregullt dhe njohës i normave islame (të paktën kështu duket nga teksti që ka shkruar). Fatosi u ka dërguar një letër krerëve të Komunitetit Mysliman të pranishëm në "iftarin e shtruar" (siç thuhet saktësisht me terma fetarë) nga Berisha dhe u terheq atyre vëmendjen që kanë bërë një shkelje nga këndvështrimi islam që kanë pranuar ftesën.

Mahmutaj shkruan se "është besimtar dhe agjërues i rregullt prej më tepër se një dekade e gjysmë" dhe pastaj drejton disa pyetje për "imamët dhe besimtarët pjesëmarrës në iftarin e Saliut, për të cilët mendoj se vërtetë kanë qenë agjërues".  

Shkruan Mahmutaj: "…Ju lutem mos mu përgjigjni që nuk ishte haram ushqimi i konsumuar. Mund të më thoni: Ku i ka gjetur Berisha paratë për të shtruar këtë iftar? Të themi që këto para ia kanë dhuruar Berishës dhe ai me dashamirësi i harxhoi me një iftar!? Jo. Profeti Muhamed a.s. e ka ndaluar kategorikisht dhuratën për shkak të detyrës. Kështu që dhuruesi (nëse ekziston një i tillë) do të ishte më mirë ta shtronte vetë iftarin… Iftari u shtrua në një nga rezidencat qeveritare. Pra fatura e shpenzimeve i kalon atyre që kontribuojnë në arkën e shtetit.  Po citoj një frazë që e kemi dëgjuar shpesh nga gojët e imamëve. “Shqipëria konsumoi kamatën dhe për pasojë përjetoi ’97-ën!”. I Madhi Zot na ka njoftuar se kamata është luftë e hapur me të… E kuptoj mirë faktin se jo të gjithë besimtarët janë si profeti Ibrahim a.s., që të kundërshtojnë siç, Ai a.s., kundërshtoi mbretin mizor Nemrud, por do të ishte më mirë refuzimi për këtë iftar hipokrizie në mënyrë që të mos bëhën edhe muslimanët pjesë e mëkatit. I Madhi Zot e di më së miri këtë punë, por nuk do të ishte më mirë ta çelnit iftarin e Xhumasë, ditës së bekuar, në shtëpitë tuaja me familjet, apo të ftuar nga njëri-tjetri me ushqim hallall!? Si thoni!?.."