Fshati i drogës kërkon vullnet politik, thotë kreu i policisë Didi!

Kreu i policisë së Shtetit Artan Didi, i kaloi fizikisht tangent Lazaratit ditën e sotme, gjatë një inspektimi në policinë kufitare të Kakavijës. Por Didi nuk ngurroi të flasë për fenomenin dhe fshatin në fjalë, duke e quajtur “një çështje komplekse”, për të cilën “duhet vullnet politik për ta zgjidhur”. “Lazarati është një problem kritik dhe nuk mund të fshehim kokën si struci para një dukurie të tillë”, ka thënë kreu i policisë, duke kërkuar për Lazaratin mbështetjen e të gjithëve, përfshirë edhe median”. "Jo vetëm policia mund ta zgjidhë këtë problem dhe do kërkojmë ndihmën e medias dhe instrumenteve sociale, që kur të shkojmë në Lazarat të hyjmë me mekanizma shtetërore të agjencive ligjzbatuese dhe të tjerave, të cilat janë të interesuara që Lazarati të mos mbetet një njollë e zezë dhe njerëzit aty ta shikojnë mirëqenien me punë të ndershme".

Deklarata e Didit dëshmon pafuqi shtetërore e policore, paçka se duhet vlerësuar për sinqeritetin. Çfarë vullneti politik (si çështja e tre ligjeve!?), atëherë, duhet për Lazaratin, përveç ojf-ve dhe mediave që qenkan të nevojshme për kthimin e fshatit në udhën e ligjshmërisë? Didi gati sa nuk thotë që PD-PS duhet të merren vesh së bashku, qoftë dhe me shtysën ndërkombëtare, që ta fshijnë këtë njollë: Demokratët të bindin banorët të mos bëjnë rezistencë, socialistët të udhëzojnë policinë të mos ushtrojë dhunë. Dhe të gjithë të kënaqur…

a.k