Fatos Nano bën tabelë qitjeje Ristanin dhe Nokën

Kritikat në adresë të Arben Ristanit dalin nga shumë burime të opozitës, e të shoqërisë civile, por kritika që i është bërë sot nga Fatos Nano, apo në emër të Fatos Nanos, ka qenë disi e papritur. “Arben Ristani është modeli dhe fryma e privatizimit dhe partiakizimit të institucioneve të shtetit shqiptar, e si i tillë ai nuk mund të jetë më pjese e vazhdimësisë, kur në lojë është reformimi europian i vendit. Mendësia e re që kërkohet është mendësia e depolitizimit, departiakizimit të institucioneve dhe shtetit shqiptar, duke ua rikthyer ato qytetarëve shqiptarë”, thuhet në një deklaratë të bërë nga njerëzit e ish-leader-it socialist. Por nuk është vetëm kritika që të bën përshtypje. Janë dhe tonet e ashpra, vendosmërisht opozitare. “Avokatia që Sali Berisha i bën Arben Ristanit është provokative dhe e patolerueshme, dhe një atentat i rëndë që i bëhet nevojës për mirëbesim dhe mundësive për bashkëpunim me opozitën shqiptare”, thuhet në përgjigje të superlativave, me të cilat Berisha e përshkruajti dje Ristanin. Dhe në fund e hap lojën edhe tek Ristanë të tjerë, sidozot tek Flamur Noka: “Me avokatinë që i bën Arben Ristanit dhe me Flamurin e Partisë Demokratike që nga sot do të fillojë të valëvitet edhe në zyrën e Ministrit të Brendshëm, Sali Berisha vetërrëfehet i orientuar drejt udhës që rrezikon reformat, kërcënon zgjedhjet e lira dhe të ndershme dhe ndëshkon shqiptaret me dështimin e rradhës me mosmarrjen e statusit kandidat”.

Re.Pu.