Fatmir Sejdiu tërhiqet nga zgjedhjet: Isa Mustafa luajti me autoritetin dhe emrin tim

Fatmir Sejdiu Ish kryetari i LDK-së dhe ish-President në Kosovë, ka sqaruar në media për debatet që ai ka patur me Isa Mustafën, debate të cilat janë komentuar gjatë ditët e fundit. Mediat në Kosovë kanë komentuar emrin e tij në kontekste të ndryshme për kandidaturën e tij në zgjedhjet e 8 Qershorit.

Sejdiu ka saktësuar se: “Të hënën, më datë 12 maj, mora një mesazh telefonik (sms) nga z. Isa Mustafa, kryetar i LDK-së, në të cilin ai theksonte se është i interesuar të takoheshim të nesërmen, pra të martën, për të biseduar lidhur me zgjedhjet. Është kjo koha kur tashmë përfundonte propozimi për kandidatë që bëheshin nga degët e LDK-së, pra një ditë mbasi të mbyllej ky proces. Pavarësisht, nga ky fakt, me vullnetin e mirë ia ktheva përgjigjen se nesër mund të takoheshim.

Të nesërmen, kur unë pritja se do të saktësojmë kohën e takimit, mora një mesazh tjetër, në të cilin z. Mustafa kërkonte shtyrjen e takimit për të mërkurën. E njoftova se unë do të duhet të udhëtoja jashtë të mërkurën herët në mëngjes dhe nuk do të isha në Kosovë deri të premten vonë, që nënkuptonte se mund të takoheshim kurdo gjatë të martës. Nuk pati një përgjigje pohuese. Kështu edhe ky pretendim për takimin mori fund, ndërsa unë udhëtova sipas itinerarit që e kisha caktuar javë më parë.”.

Në këtë kohë mediat komentuan se ai nuk do të ishte në listat e deputetëve të LDK-së për zgjedhjet lokale. Më tej ish-Presidenti thotë: “Të enjten mora një mesazh po nga z. Mustafa ku kërkohej pëlqimi im për të qenë kandidat në listën e LDK-së, pa specifikuar asnjë detaj tjetër. Unë i kërkova atij që të mos përdorej emri im pa biseduar paraprakisht për këtë çështj.

Unë jam kthyer në Prishtinë herët në mëngjesin e së shtunës, ndërkohë që në mbrëmjen e së premtes ishin dorëzuar në KQZ listat me emrat e 110 kandidatëve të LDK-së. Duke marrë parasysh gjithë këtë proces dhe vënien e emrit dhe autoritetit tim politik dhe intelektual në kontekste joserioze, në mënyrën siç është bërë dhe prezantuar nga lidershipi i LDK-së, unë kam vendosur për të mos qenë pjesë e listës së bërë nga Kryesia e Lidhjes Demokratike të Kosovës për zgjedhjet parlamentare që do të mbahen më 8 qershor.”, përfundon Fatmir Sejdiu.

http://zeri.info/artikulli/34638/fatmir-sejdiu-lidershipi-i-...

S.S