Enver Hoxha në raportet britanike të Luftës: “kur humbet balancën,bëhet i pamundur”

Në një dossier sot tek Panorama, vjen raporti i Majorit W. Smith, hartuar për zyrën e luftës së Britanisë së Madhe në qershor 1944. Majori britanik, që ishte nr. 2 i misionit britanik të SOE (Special Operations Executive), thuhet se e ka shkruar këtë dokument pas 8 muajsh qëndrimi pranë forcave partizane, dhe në të jepen vlerësime për figurat e luftës. Enver Hoxha komentohet si kukull e emëruar në krye të Forcave të Armatosura dhe lider i Këshillit Antifashist Nacionalçlirimtar. Vlerësime të larta nëraport duket se shkojnë për Mehmet Shehun, i cili cilësohet si personalitet i shquar, komandanti më i mirë, dhe madje vlerësohet si çudi fakti pse nuk ishte ai në vend të Hoxhës. Personazhe kryesore nga lufta partizane në Shqipëri, janë analizuar me detaje në raportin e Majorit.

Pjesë nga raporti:

“Më 8 qershor u nisëm për në Odriçan… Partizanët po tërhiqeshin drejt nesh duke lëvizur drejt Përmetit. Shkuam në Odriçan, ku takova Enver Hoxhën dhe të tjerë, i cili ishte i pandërgjegjshëm për situatën, madje ishte goxha i kënaqur, ndërsa të gjithë anëtarët e tjerë rrinin si struci dhe nuk kishin asnjë lloj komunikimi me frontin”.

Vlerësimet:

ENVER HOXHA: Kryekomandanti i Forcave të Armatosura (një kukull e emëruar). Lider i Këshillit Antifashist të LANÇ. Personaliteti i tij është unik. Dalja e tij në Kongres u përshëndet çdo herë nga duartrokitje fanatike, që zgjatnin nga 5 deri në 10 minuta. Ai ka marrë trajnime diplomatike gjatë një kohe dhe ka një qëndrim të gatshëm nëse është në humor. Por kur shikon se e humbet balancën, bëhet i pamundur.

HAXHI LLESHI: Ministër i Brendshëm, pothuaj një individ ogurzi. Ai asnjëherë nuk flet dhe nuk e besoj që është antibritanik, por të jep përshtypjen se nuk do t’ia dijë se çfarë ndodh jashtë Shqipërisë.

SPIRO MOISIU: ...Komplet i trashë...

MEHMET SHEHU: Mjaft rinor (rreth 30-35 vjeç), shumë aktiv dhe pa dyshim komandanti më i mirë i LANÇ. Personalitet i shquar dhe është i respektuar, por shihet me frikë nga kushdo për disa arsye. Si komandant i Brigadës së Parë, ai luftoi mirë dhe brigada e tij mbeti si “shpirti i trupave”, çka është arsyeja fondamentale e suksesit të tij. Caktimi i tij si koloneli i dytë në detyrë në Divizionin e Parë, erdhi si “shok” te kushdo që priste caktimin e tij si komandant. Roli parësor i Brigadës së Parë ishte pothuaj një spastrim në veri e, për më tej, është e mundur që Mehmet Shehu të shfaqet si komandat i vërtetë, duke anashkaluar komandantin e vendosur për qëllime politike.

k.c.

E plotë:

http://www.panorama.com.al/2013/10/06/raporti-britanik-enver-hoxha-nje-kukull-e-emeruar-spiro-moisiu-i-trashe/

(në foto, partizanë dhe britanikë: Behar Shtylla, Enver Hoxha, Geri Dafi, David Smajli, Spiro Moisiu, Villi Mel, Andi Hends, Ramadan-Çitaku dhe Dali Ndreu)