Ekipet shqiptare, katër ndeshje të tjera të trukuara së fundi, thotë FederBet

Jo se përbën ndonjë lajm të ri për ndjekësit e futbollit shqiptar dhe tifozët, por tashmë ka edhe “vulë” zyrtare. Kompania e specializuar kundër trukimeve “FederBet”, i ka dërguar një raport të hollësishëm Parlamentit Europian me një listë të gjatë të ndeshjeve të dyshuara si të manimpuluara, ku bëjnë pjesë edhe disa takime të kampionatit shqiptar por edhe ndeshjet e zhvilluara në Europë. Dy sfidat e luajtura në kuadër të javës së 30 të kategorisë sonë superiore, Kastrioti – Tirana 2-3 dhe Lushnja – Teuta 0-2, kanë qenë të trukuara, zbulon Federbet. Gjithashtu edhe dy ndeshjet e luajtura në Europë nga ekipet shqiptare, Skënderbeu – Shakhtar Karagandy 3-2 dhe 0-3 ( të dyja takimet ) si dhe Teuta -Dacia 3-1 dhe 0-2 ( të dyja takimet). Federbet, me seli në Bruksel, ka nënshkruar një marrëveshje bashkëpunimi me FIFA-n, Federatën Spanjolle të futbollit, si dhe me disa klube të rëndësishme europiane për evidentimin e sfidave të dyshuara si të trukuara. Ajo është një organizatë e themeluar në vitin 2010 me iniciativën e disa pronarëve kazinosh të mirënjohura dhe kompanive të mëdha të bookmakers-ave, dhe asiston BE-në me qëllim unifikimin e bazës ligjore dhe saktësimin e rregullave në fushën e basteve sportive dhe lojrave të fatit. Pjesë e punës së kësaj kompanie është pikërisht identifikimi i ndeshjeve të trukuara dhe lufta ndaj këtij fenomeni.  

a.k