Edhe Gërdeci "aksident": Nuk ka vrasje, sepse "të pandehurit nuk kanë synuar këtë pasojë" - thotë Gjykata e Lartë

Gjykata e Lartë ka zbardhur vendimin për mospranimin e rekursit të dosjes së Gërdecit. Pak ditë më parë, trupi gjykues i përbërë nga Tom Ndreca, Admir Thanza, Shkëlzen Selimi, Medi Bici dhe Ardian Nuni, vendosën mospranimin e rekursit, të paraqitur nga të gjitha palët në gjykim për dosjen “Gërdeci”. Ndërsa pak ditë më parë u publikua fakti se Gjykata e Lartë nuk e pranonte rekursin, sot zbardhen motivet se përse trupi gjykues vendosi t’i japë fund, ligjërisht, dosjes së Gërdecit, ku u vranë 26 persona dhe u plagosën qindra të tjerë. Ajo që bie në sy është fakti se anëtarët e trupit gjykues  mendojnë si ish-kryeministri Sali Berisha për këtë tragjedi. Gjyqtarët Tom Ndreca, Admir Thanza, Shkëlzen Selimi, Medi Bici dhe Ardian Nuni vendosin që tragjedia e Gërdecit është një aksident teknologjik.

Së paku, kështu argumentohet në relacionin mbi 100 faqe të anëtarëve të trupit gjykues. Sipas relacionit të bërë publik, Gjykata e Lartë mendon se në rastin e shpërthimit të fabrikës së Gërdecit nuk kemi të bëjmë me vrasje me dashje, sepse askush nga të pandehurit nuk ka synuar këtë pasojë, vdekjen e 26 personave dhe rrafshimin e disa fshatrave. Sipas trupit gjykues, tragjedia është shkaktuar nga moszbatimi i rregullave të sigurisë teknike në punë dhe fajtorë për këtë ngjarje, ku u vranë 26 persona, janë punëdhënësit. Një vendim ky kontradiktor, pasi gjatë shpërthimit të fabrikës së Gërdecit nuk kanë gjetur vdekjen vetëm punonjësit e fabrikës, por edhe fëmijë që luanin në oborrin e shtëpisë si Erison Durda apo dhe 3- vjeçari Flavio Deliu. a.n.