E natyrshme, por jo e mjaftueshme - thotë Dokle i PS-së për lëvizjen e LSI-në

Deputeti i Partisë Socialiste, Namik Dokle, në një intervistë botuar në të përditshmen Panorama, thotë se qëndrimi i LSI-së në koalicionin aktual del përtej interesave të saj partiakë.

Thotë Dokle: “Më vjen mirë që me shumë miq që sot janë në LSI (nganjëherë nuk e kuptoj pse), takohemi te Varrezat e Dëshmorëve dhe jo te varrezat e Qartallozit! Veprimi i dytë ka të bëjë me interesat  parcialë elektoralë të LSI-së dhe kjo është e natyrshme. E natyrshme, por jo e mjaftueshme! Do të vazhdojnë me lëvizje të vogla taktike dhe të mbështesin qeverinë, apo do të binden më në fund se qeveria Berisha është dëmtimi i Shqipërisë me korrupsion, me padrejtësi, me varfëri, me demokraci të deformuar, me bllokim të reformave dhe demagogji të stërkonsumuar për to? Kjo është analizë që LSI duhet ta bëjë edhe vetë, ne presim të shikojnë se çdo të bëjnë. Vendimi i tyre ka të bëjë jo vetëm me fatin e forcës së tyre politike në të ardhmen, por në një masë të caktuar edhe me fatet e vendit”.

Ndërsa për sa i përket festimeve të 100 vjetorit, Dokle deklaron se: “Dikur një shef i shtypit në Komitetin Qendror u thoshte gazetarëve: Historia?! E dini ç’është historia? Një thes me ngjarje dhe personazhe, ku ti duhet të fusësh dorën dhe të nxjerrësh ngjarjen dhe personazhin që të intereson për politikën e ditës. Ja, kështu i trajtuan ngjarjet dhe personazhet e historisë të pushtetshit e sotëm. Tëpkë njëlloj. Dhe ky qëndrim është anti-heroizëm. Historia nuk është torta e Lul Bashës ku gjithkush mund të marrë ç’të dojë dhe të mbushë legenët e politikës. Unë nuk e harroj kurrë një thënie të Andreotit, kur e quajtën personazh historik, ai tha: Jo, jo. Historia është një çështje serioze! Unë jam thjesht pjesë e kronikës. Historia vjen më vonë!”. A.N.