E di? Të përbuz Florjon!

Dy prej tyre i kanë vënë flakën vetes... E megjithatë, ky fakt s’e ka penguar kryeministrin në përpjekjet për të denigruar secilin prej grevistëve, - shkruan Mustafa Nano në editorialin e tij të sotëm në të përditshmen SHQIP. Por nervin  e shkrimit, shqetësimin kryesor nuk e ka me të. "Këtë punë ka bërë gjithë kohën ky sojsëz - “gjëja më e pafat” për ne është se kurrë nuk ka qenë i vetëm në këtë histori, - shkruan Nano dhe shton:  "Në çdo aksion për të baltosur, linçuar e kryqëzuar kundërshtarët, ashtu si në gjithë projektin e vet për ta sunduar këtë vend si një satrap, ai është ndihmuar nga mijëra të tjera, të cilët përbëjnë establishmentin sundues".

Nano merr si ilustrim deklaratën e djeshme të Florjon Mimës, deputeti i PD, i cili doli dje përpara kamerave pikërisht teksa Lirak Bejko (në foto) përfundoi në spital me 50% të trupit të djegur: “PS-ja duket e qetë, por po përdor krahun e zgjatur me disa individë, që më vjen keq që janë pjesë e grupit të të përndjekurve. Sjellja e tyre lë shumë për të dëshiruar. U deklarua se kanë kërkesa ekonomike, ndërsa thonë që s’tërhiqen nëse nuk largojnë Berishën nga pushteti. Lind pyetja, është një protestë ekonomike kjo? Absolutisht jo. ...Dhe vjen kjo ditë që shfaqemi me një imazh të tillë në sytë e botës. Për mua ai person (Gjergj Ndreca) nuk ka një kauzë” - tha  Mima i cituar në TemA Online.

Për Mustafa Nanon, kjo është një sjellje që ngjall përbuzje, të cilën ai e shpreh hapur dhe me forcë në editorialin në SHQIP:  "Ta zëmë se greva nuk është ekonomike, por është politike, e pastaj? Ç’të duhet ty, nëse Gjergj Ndreca nuk e ka një kauzë? Si është e mundur, mor rob Zoti, që përballë një drame të tillë humane e një akti të tillë vetëflijimi, ty të shkon mendja se i vetëflijuari nuk ka kauzë, se ai përdoret nga PS-ja, se ata e kanë mendjen të rrëzojnë Sali Berishën? Cila është më e rëndësishme për ty, fakti që dikush i vuri flakën vetes, apo fakti që ky dikush qenka i përdorur? Çfarë dreqin do duhet të bëjë një qytetar i Republikës për të fituar vëmendjen tuaj, e për të gjetur gatishmërinë tuaj për ta negociuar hallin e kërkesën e tij? E di? Të përbuz Florjon. Të përbuz njëherë si shërbëtor 24 karatësh që je; të përbuz për herë të dytë, ca më shumë në këtë rast, si shërbëtor që pranon deri dhe detyrën për të denoncuar publikisht shërbëtorë të tjerë; dhe të përbuz për herë të tretë, akoma më shumë në këtë rast, që ndër mijëra tipologji humane të ndryshme, shkon dhe i gjen shërbëtorët ndër ata njerëz që i vënë flakën vetes. Ptu!" - (A.N.)

Nano i plotë: http://top-channel.tv/artikull.php?id=243891
Foto: Pamje tronditëse marrë nga televizioni News 24, e cila tregon ish-të perndjekurin politik Lirak Bejko, 47 vjeç, në momentin që i ka vënë flakën vetes me benzinë, në ditën e 19 të grevës së urisë.