Dy viktima në punë, bien nga skela punëtorët. Njëri ende i paidentifikuar

Ishin duke punuar prej një jave për disa punime të jashtme në katin e  shtatë të një pallati në rrugën “Dora D’Istria” në kryeqytet. Ngjarja fatale ndodhi sot, kur dy punëtorë ndërtimi kanë rënë nga lartësia. Si pasojë e përplasjes njëri syresh ka humbur jetën menjëherë pa mundur të marë ndihmën mjekësore ndërsa punëtori tjetër është nisur spital dhe ka ndërruar jetë rreth orës 17:35 në Spitalin e Traumës në Tiranë. Në bazë të hetimeve të deritanishme mësohet se shkak i aksidentimit të tyre gjatë punës është bërë këputja e skelës, ndërsa policia po merr në pyetje dhe pronarët e pallatit. Sipas policisë njëri nga viktimat është Muhamet Smakaj, 50- vjeç, baba i 6 fëmijëve dhe banues në Bathore. Emri i punëtorit tjetër që humbi jetën ende nuk bëhet i ditur, pasi nuk i është gjetur me vete ndonjë dokument identifikues. Mësohet se një punëtor i tretë, 18 vjeçar, ka shpëtuar paq pasi është mbajtur momentin e fundit. Në vendin e ngjarjes kanë mbërritur edhe ekspertët e ISHP-së, të cilët po hetojnë nëse janë zbatuar kushtet ligjore dhe kushtet e sigurisë në punë, por zor që këto të fundit të kenë ndodhur. Kësisoj, viktimat nga pasiguria rrugore po alternohen rregullisht me ata nga pasiguria në punë dhe anasjelltas.

a.k