Dy gazetarë muslimanë bisedojnë për Berishën...

Fatos Mahmutaj është një nga të plagosurit e 21 janarit. Eshtë gazetar dhe pas ngjarjes jeton jashtë Shqipërisë, me statusin e azilantit. Ndoshta pak e dinë që është edhe praktikant musliman. E përditshmja DITA ka botuar në numrin e sotëm një bisedë mes tij dhe një gazetari tjetër gjithashtu praktikant musliman, Ermir Hoxha. Flasin për Berishën dhe mes të tjera thonë:
E.H. - Në trajtesat, denoncimet apo akuzat tuaja anti-regjim, keni tentuar të jeni dhe pak tej-tokësor, t`u kujtoni Berishës apo Ndrea Prendit, se i pret një përballje më e rëndë një ditë, ajo me Zotin…
Po, sepse njeriu mund të bëjë gjithë ligësitë e mundshme në këtë botë e mos ta marrë ndëshkimin që meriton sa të jetë gjallë. Por kur të mbyllë sytë, atëherë sheh se ajo fjala “ç`të mbjellësh do korrësh”, nuk është thjesht një metaforë, është reale deri në tmerr. Kanë tejkaluar çdo limit. Zoti i dhëntë drejtim kësaj pune, pasi shqiptarët vetë nuk kanë ç'ti bëjnë.
Ju jeni njeri besimtar që dhe jeten e jetoni me principe besimi. Në këtë prizëm, çfarë ju çmerit më tepër?
Me thënë të drejtën në këtë prizëm, do thoja që kam antipati jashtë mase për drejtuesit fetarë, (të të gjitha religjoneve) që i bëjnë fresk pushtetit, për të mbajtur karriget e tyre dhe për të vjedhur nga pasuritë që janë pronë e besimtarëve. Vitet e fundit, i kemi parë drejtues të religjoneve të ndryshme të mbështesin nisma qeveritare që jo vetëm bien ndesh me mendimin e pasuesëve të tyre, por ka edhe raste kur janë në kundërshti të hapur me librat hyjnorë.
Me troç, ju e jetoni jetën si musliman...
Më troç unë gjykoj se: një musliman nuk mund të gënjejë, ndërsa Berisha mashtron 'non stop'; një musliman nuk mund të derdhë gjak të pafajshmish, ndërsa të vrarët e Berishës nuk numërohen; një musliman nuk mund të vjedhë, ndërsa Berisha ka vite që po e bën; një musliman gjykon gjithmonë me drejtësi, nga sjellja e Berishës buron padrejtësi; një musliman gjithshtu nuk mund të çojë kurrë në mend kamatën, pasi është parashikuar qartë si: "luftë e hapur me Zotin", ndërsa Berishës për të mos i përmendur firmat piramidale, po i kujtoj vetëm kolapsin ekonomik në të cilën ka zhytur momentalisht Shqipërinë. Musliman përkthehet: të besosh e të bësh punë të mira. Dalloni ju tek Berisha ndonjë shenjë që mund t`i bartë këto virtyte?! - Re.Pu.