Dua ta falënderoj për orët e vështira mes nesh - thotë Rama për ambasadorin amerikan

Edi Rama ka zhvilluar mbrëmë pritjen e parë për trupën diplomatike të akredituar në Tiranë, duke ndryshuar traditën e zhvendosjes së këtij eventi, nga Pallati i Brigadave në sallën e ndryshuar në Këshillin e Ministrave, të veshur me harta të Europës.

Televizioni TCH raporton ndër të tjera: "Teksa falënderoi në fillim të fjalës ambasadorët më të spikatur dhe me kontribute edhe për shkak të momenteve, kur ata kanë qenë në Shqipëri, ra në sy mungesa e emrit të Alexander Arvizu, ambasadorit në ikje të SHBA-ve. Por, emrin e tij Rama e kishte ruajtur për në fund, ku përveç mirënjohjes për çka bëri për Shqipërinë, e falënderoi jo vetëm për ditët e mira me të. “Dua ta falënderoj edhe për jo shumë ditë të mira, që kemi kaluar bashkë, por edhe për orët e vështira mes nesh, ku nuk m’i ka fshehur mendimet e tij, të ndryshme nga të miat. Jam i bindur se, në orë të atilla, miqësitë e vërteta marrin formën e tyre të qëndrueshme për të gjithë jetën”. a.n.