Doshi sot përballë prokurorëve dhe surprizave në seancën plenare. Pse opozita po e zhvendos debatin tek “mëkatet” e Saimir Tahirit dhe takimet e tij me Durim Bamin?

Tom Doshi bëri lëvizjen e radhës në mbrojtje të pretendimeve të tij për atentatin që po i përgatiste Ilir Meta, duke publikuar një video me Durim Bamin, i arrestuar tashmë nga policia me kërkesë të Prokurorisë. Të enjten ish-deputeti socialist ka deklaruar se do të deponojë në Prokurorinë e Krimeve lidhur me provat që disponon lidhur me këto pretendime, përfshirë edhe videon e publikuar në faqen e tij në Facebook. Por e enjtja mund të jetë një ditë surprizash për Doshin nisur nga sa ka deklaruar kryetari i Komisionit të Sigurisë, Spartak Braho, për publikimin e një videoje që nxjerr zbuluar ish-deputetin socialist.
Ndërkaq, rrëfimi i gjatë i ministrit të Brendshëm, Saimir Tahiri, orë pas ore, po shfokuson vëmendjen nga dilema nëse atentati i parapërgatitur ndaj deputetit Tom Doshi, është i vërtetë apo i sajuar dhe po e zhvendos debatin në seriozitetin dhe mënyrën si qeveria, prokuroria dhe policia e ka menaxhuar çështjen “Doshi”. Në cilësinë e dëshmitarit, por jo të atij të thirrur në Prokurori, ministri i Brendshëm pranoi se kishte takuar në zyrën e tij personin e pretenduar se i ishin premtuar 500 mijë euro për të kryer atentatin ndaj dy deputetëve të parlamentit shqiptar. Edhe Partia Demokratike, në deklaratën e fundit të bërë nga Sekretari i Përgjithshëm Arben Ristani, nuk ka këmbëngulur në akuzat për Ilir Metën si autor të kësaj ngjarjeje, por është fokusuar pikërisht në menaxhimin që kryeministri, ministri i Brendshëm, kryeprokurori dhe drejtori i Përgjithshëm i Policisë i bënë pretendimeve të Tom Doshit.
l.m