Dokumenti për “manovrat” e Porto-Romanos: Ja skema e familjes Berisha për të fituar me trojet

Familjarët e kryeministrit blejnë një tokë të helmuar dhe kënetore, shefi i qeverisë merr një vendim që ja shumëfishon vlerën truallit dhe të gjithë dalin të fituar. “Balkaninsight” i është rikthyer çështjes së Porto Romanos, duke siguruar dokumente të shit-blerjeve të tokave ku familja Berisha dhe rrethi i ngushtë i tyre fituan miliona nga pazaret me Fazlliç. Dokumentet që ka siguruar BIRN implikojnë familjen e ish-kryeministrit, dhëndrin dhe vajzën, Jamarbër e Argita Malltezin. Sipas dokumenteve, në nëntor 2006, vajza e Berishës, Argita dhe kolegia e zyrës avokatore Flutura Kola, blenë tokë me 10 euro për metër katror, dy herë më shumë se sa vlera e tregut në zonën e kënetore të Porto Romanos. Toka rreth 14 hektarë u ble në kufijtë e një ‘parku energjetik’ të vogël të lidhur me portin, për t’iu rishitur biznesmenit të dyshimtë boshnjak dhe këshilltar të Berishës gjatë zgjedhjeve, Damir Fazlliç, i cili i pagoi më shumë se sa katër herë çmimin e tregut – 18 euro për metër katror”. Në atë kohë, Berisha Kryeministër mori një vendim kryeministror për të lëvizur kufirin e parkut energjetik, duke përfshirë aty dhe pronat e reja të Fazlliçit, vlera e të cilave u shtua automatikisht. Nëse planet e tij për të zhvilluar zonën në një terminal nafte me vlerë 70 milionë euro do të vijonin, ai do të fitonte dhjetëra milionë euro.

a.k