Digjen foto të Berishës, ndalohen 5 protestues. AK: Ata 5 janë oficerët e nesërm që do arrestojnë Berishën

Foto të kryeministrit Sali Berisha janë djegur sot para Kuvendit të Shqipërisë gjatë një proteste të paralajmëruar në mbështetje të ish-të përndjekurve politikë në grevë urie. Protestuesit kanë thirrur “Të rrëzojmë Berishën, të çlirojmë Shqipërinë”, ndërkohë që Parlamenti zgjidhte sot anëtarët e rinj të KQZ që do vulosin zgjedhjet e 2013-s.
Shumica e pjesëmarrësve në protestën e sotme kanë qenë aktivistë të Aleancës KuqeZi, drejtues të së cilës i kanë bërë apel kryeministrit të plotësojë kushtet e grevistëve, duke iu drejtuar atij me termin e tyre të preferuar "shtetasi“. Në një deklaratë për shtyp të tyre thuhet:  "Aleanca KuqeZi i bën apel shtetasit Sali Berisha që të plotësojë brenda 24 orëve kërkesat e grevistëve. Sali Berisha është fytyra çnjerëzore e krimit. Në vitin 1997, ai dogji Shqipërinë, tani po djeg popullin”.
AK ka njoftuar gjithashtu se disa nga aktivistët e saj në protestë janë arrestuar nga policë pa uniforma. Edhe në këtë pikë reagimi i AK ka qenë tipik: "Ata 5 djem që u ndaluan sot do jenë oficerët që do arrestojnë nesër Sali Berishën"