Deputeti Strazimiri ka 'zgjidhjen magjike' për bojkotin e opozitës në Komisione

Ka politikë po ka edhe... bordero. Një "zgjidhje" që deputetët e opozitës që të mos largohen në shenjë proteste nga mbledhjet e Komisioneve parlamentare gjatë shqyrtimit të projektligjeve? E ka gjetur deputeti Gent Strazimiri. Të djathtët kanë menduar që t'u përgjigjen me sanksione financiare, protestave politike të kolegëve të tyre të majtë. Do t'u mbahen lekët nga paga, ashtu siç ndodhi në periudhën kur deputetët e opozitës bojkotuan parlamentin për çështjen e hapjes së kutive të votimit për zgjedhjet e përgjithshme parlamentare të 2009-s.
Deputeti demokrat, Gent Strazimiri, propozoi dje pas largimit të deputetëve të opozitës që listë- prezenca e tyre në komisione të mbahet "në fund të mbledhjes" jo në fillim të saj.
“Listë-prezencën e komisionit që përcakton kuorumin që ka pasur komisioni gjatë punës së tij dhe mbi të cilën vendoset edhe pagesa për këtë mbledhje - ta kalojmë në fund të mbledhjes dhe jo në fillim të saj. Kolegët socialistë përveç detyrës politike që bënë dhe propagandës që bënë këtu firmosën sikur e kanë bërë punën që duhet të bënin. Firmosën dhe tani ikin. Ata vijnë për të firmosur dhe për të ikur. Ju lutem firmat të mblidhen në fund të mbledhjes së komisionit. Kush ka punuar ai duhet të marrë paratë e taksapaguesve” - propozoi Strazimiri dhe propozimi procedural u pranua edhe nga deputetët e tjerë të mazhorancës.
Pritet për t’u parë nëse ky rregull do të zbatohet edhe nga vetë deputetët demokratë, pasi fenomeni i plotësimit të listë-prezencës nga deputetët në fillim të mbledhjes është mëse i zakonshëm për të zgjedhurit e të dy forcave politike.