Deputeti grek shpallet "non grata" (mundësitë që i jep media shqiptare e heroizojnë te ekstremistët në Greqi)

Deputeti i “Agimit të Artë”, Kristo Papas, nga dje është person “non grata” në Shqipëri. I ftuar në emisionin “A Shoë” në ‘Vizion Plus’,  ministri Edmond Panariti pohoi se Papas do të ndalohet të hyjë në Shqipëri si një person që nxit urrejtjen mes kombeve. “Me ndalimin e hyrjes së këtij personi në vendin tonë, ne u shërbejmë interesave kombëtare por edhe frymës europiane të fqinjësisë së mirë”, – citohet Panariti edhe nga e përditshmja MAPO. Qëndrimi i pazakontë për nga shpejtësia i Ministrisë së Jashtme shqiptare i është bërë me dije edhe policisë, e cila do të duhet të ndalojë në të ardhmen çdo përpjekje të deputetit të “Agimit të Artë” për të hyrë në Shqipëri. Për publikun shqiptar, personi në fjalë është bërë i njohur gjatë dy ngjarjeve që kanë shkaktuar tension mes dy vendeve. Rasti i parë është ai i 12 gushtit të vitit 2012, kur merrte pjesë në ceremoninë përkujtimore të Aristotel Gumës në Himarë. Në këtë prezencë të tij në Himarë, ai artikuloi publikisht se Himara është tokë greke. Më 28 tetor 2012, Papas u rishfaq sërish në Shqipëri me rastin e përkujtimit të ushtarëve grekë të rënë gjatë luftës italo-greke.

Po të gjykosh nga raportimet e medias greke, me deklaratat në Shqipëri dhe me qëndrimet e Shqipërisë deputeti në fjalë në fakt fiton pikë në atë pjesë të elektoratit grek që voton ekstremistët e Agimit të Artë. A.N.