Deportimi i 21 vjeçarit “toskan” në Shqipëri, çështje në parlamentin italian

E ka lënë Shqipërinë foshnje 3 vjeçare dhe tani, 21-vjeçari shqiptar është kthyer në çështje në Itali, pasi ai rrezikon të deportohet në vendlindje. Megjithëse ndodhet në qytetin e Lukas në Itali prej 18 vitesh, Romino Vellku rrezikon të deportohet. Çështja e tij do të shkojë deri në Parlament, ku do të diskutohet ky vendim. Mediat italiane i kanë kushtuar vëmendje këtij rasti, duke pohuar se “një toskan është mbyllur në qendrat e riatdhesimit”. Ai i kalon ditët bashkë me emigrantët në pritje të largimit përfundimtar nga Italia. Jeton në Luka qëkur ka qenë 3 vjeç. Roni sot është 21 vjeç. Flet në dialektin toskan dhe në Shqipëri nuk ka miq dhe të afërm, madje nuk ka as edhe shtëpi. Prindërit e tij jetojnë në Luka, gjyshërit e tij jetojnë në Luka, të gjithë të rregullt. Miqtë e tij janë toskanë, vëllai i tij ka lindur në Itali, ashtu si edhe e fejuara. Prej një muaji qëndron i mbyllur në një qendër në Bari. Për faj të adoleshencës së trazuar atij nuk mund t’i rinovohet leja e qëndrimit. Në “karrierën e tij prej krimineli” ai është dënuar me 2 vjet burg për një vjedhje dhe një grabitje. “Është e vërtetë që kam grabitur, që kam bërë gjëra të gabuara, por e shlyeva detyrimin tim me 2 vite burg dhe tashmë jam i pastër. Nëse më dërgojnë në Shqipëri më dërgojnë në një vend të huaj, në një vend që unë s’e njoh. Unë jam italian!”, thotë ai për mediat italiane.

Lexoni më shumë në linkun: http://gazeta-shqip.com/lajme/2014/04/28/deportimi-shqiptarit-mberrin-deri-ne-parlamentin-italian/

a.k