Deklarata e Nokës, vëllezërit Shyti, letër Berishës: Kurrë nuk t’i falim krimet që ke kryer dhe dëmet që na ke shkaktuar

Orik dhe Leart Shyti, të akuzuarit e përhershëm të Berishës si anëtarë të asaj që mediat e raportojnë si “Hakmarrja për Drejtësi” kanë dërguar sot pasdite në redaksitë e gjithë mediave në Tiranë një letër të hapur, në përgjigje të asaj që ka thënë dje ministri Flamur Noka.

Tha dje Noka: “Jam sot përpara jush, për t’i deklaruar zotit Rama, politikanit me rekordet me negative në lidhjet me krimin dhe përdorimin e grupeve kriminale në fushatat brenda dhe jashtë partisë, se përpjekja e tij është e pafrytshme. Asnjë presion nuk do të pengojë Policinë e Shtetit në kryerjen e misionit të saj, garantimin e sigurisë publike e qetësisë në vend dhe luftën kundër krimit të organizuar dhe zgjatimeve të tij, kudo qofshin këto, qoftë edhe në zyrën z. Rama... Përpjekja e zotit Rama për të nxirë arritjet e Policisë së Shtetit e bën atë tërësisht qesharak në sytë e shqiptarëve, ndërkohë që, deklarata e tij se do të krijojë një polici të re, është vetëm halucinacioni i radhës. Policia nuk është Hakmarrja për Drejtësi që mund të përdoret në fushatën brenda PS-së, Policia e Shtetit nuk është Banda e Lushnjës që mund të përdoret për të mbushur dhe mbledhur kutitë e votimit të z.Rama...”

Thuhet në letrën e vëllezërve Shyti për mediat: “Nuk e dinim, sot e morëm vesh se Sali Berisha i ka caktuar një mision të ri “Hakmarrjes”. Dje i paska thënë Edi Ramës se “Policia nuk është Hakmarrja për Drejtësi që mund të përdoret në fushatën brenda PS-së”. Sipas kësaj deklarate, Edi Rama, “kushëriri”, “krushku”, “miku”, “bashkëpunëtori”  ynë “në krime” dhe “në ndërtime pallatesh me paratë e krimit” (cilësorët janë shqiptuar në kohë të ndryshme prej Saliut),  paska “vendosur” të na përdorë në një drejtim krejt tjetër nga ai i njohuri. Tani jo më në dëm të Saliut, por në dëm të PS-së, në fushatën brenda vetes. Jemi futur në një stinë të vështirë për Saliun dhe prisnim ta përdorte krijesën e tij “Hakmarrjen për Drejtësi”, ashtu sikundër ka vepruar për gati 20 vjet. Por nuk na e kishte marrë mendja se do të na caktonte një mision të tillë.... Dihet botërisht, dhe është pranuar nga gjykata të vendit dhe të huaja, se “Hakmarrja për Drejtësi” është krijuar nga Sali Berisha në tetor të vitit 1996... I duhej të fajësonte opozitën dhe, ndryshe nga si veproi me “thikat me helm” dhe “stilolapsat pistoletë” më 21 janar, pati kohë të krijonte “provat” dhe t’i shfaqte para publikut... Nuk besojmë se ka të tjerë, veç tij dhe zëdhënësve të vet, që t’u shkojë mendja të zgjidhin çështje politike a personale me emrin e “Hakmarrjes”.... Me këtë rast, Saliut po i kujtojmë atë që i kemi thënë prej kohësh. Kurrë nuk do t’ia falim krimet që ka kryer dhe dëmet që na ka shkaktuar...” A.N.

Më shumë:

http://www.ama-news.al/2013/01/nje-mision-i-ri-i-hakmarrja-p...

http://www.gazetatema.net/web/2013/01/22/flamuri-harron-musa...