Deklaratë skandaloze e kryeministrit: Zjarrvënësit janë militantë të PS-së

Kryeministri Berisha, teksa ka folur për emergjencën e zjarreve, e ka kërkuar suksesin e qeverisë së vet tek relativizimi i dëmit. “Problemi ynë më kryesor janë jetët njerëzore të parat. Nuk kemi viktima. Janë bërë disa evakuime, por deri tani viktima nga zjarret nuk kemi pasur. Janë djegur disa banesa, por në një numër shumë të kufizuar. Mund t’u them se numri i banesave të djegura në vende të tjera të Mesdheut është shumë më i madh”, tha ai në mbledhjen e qeverisë.

Por pjesa më “interesante” e fjalës së tij erdhi më pas, ndërsa po fliste për fajtorët, dmth zjarrvënësit. “Janë arrestuar mbi 70 persona për zjarrvënie; disa prej tyre janë liruar nga Prokuroria”, u shpreh ai duke përmendur në mënyrë kinse neutrale Prokurorinë, dhe pikërisht në këtë pikë i dha gaz makinës me një deklaratë skandaloze: “Një eksponent kryesor i PS-së do t’i telefononte me shumë të drejtë ministrit [Flamur Nokës] për t’i kërkuar ndihmë për zonën e tij. Por kur ministri i thotë se ata që janë arrestuar janë militantë të thekur tuajt, telefoni u mbyll”.

Nuk dha detaje të tjera mbi zjarrvënësit, nuk na tha se çfarë orientimi seksual kanë, çfarë mendojnë për Bamir Topin, kur ia kanë dredhur grave të tyre për herë të fundit, me cilët shoqërohen fëmijët e tyre, çfarë mendimi kanë për Visho Ajazin, etj, etj. Është info që një kryeministri nuk ka se ç’i duhet, por këtij tonit i duhet, ja, siç i duhet dhe identiteti politik i zjarrvënësve.

M.N.