Braçe: Ja faktet që Berisha e ka vonuar 7 vjet rrugën Levan-Tepelenë

“E mbani mend që [Berisha] një javë më parë shkoi diku pas Fierit e bëri sikur inauguroi rrugën Levan- Tepelenë? A e mbani mend që iu tha një grushti PD-istësh, por edhe gazetareve se PS-ja bllokoi dhe vonoi ndërtimin e rrugës?” Pyetjet e mësipërme i bën Erjon Braçe, i cili për të përgënjeshtruar këtë pretendim të kryeministrit mbi sabotimin e rrugës prej socialistëve ka zgjedhur të publikojë një relacion “të nënshkruar nga Sali Berisha, që shoqëron projektligjin që kërkon të miratojë marrëveshjen e 2-të ndryshuese për ndërtimin e rrugës Levan- Tepelenë” (në foto kemi një fragment të këtij relacioni). Dhe në këtë relacion jepen shkaqet e shtyrjes së kredisë së ofruar nga Banka Europiane për Rindërtim e Zhvillim dhe të vonesës së përfundimit të këtij investimi. Braçe thotë se ky projekt është sabotuar nga kryeministri d.v. dhe e dokumenton këtë gjë me faktet e mëposhtme, të cilat, sipas tij, janë shkruar e bardha mbi të zezë në relacionin në fjalë:

1. Marrëveshja është nënshkruar në qershor 2005;

2. Marreveshja është miratuar në Kuvend në maj 2007, pra pas 2 vjetësh;

3. Ndërtimi i rrugës është vonuar për shkak të procedurave të vonuara të tenderit, lidhjes së kontratës dhe ritmeve të ngadalta të punës;

4. Ndërtimi i rrugës është vonuar nga problemi i shpronësimeve të pakryera dhe ndryshimit të projektit.

Deputeti socialist e mbyll këtë denoncim me fjalët: “Ky është Sali Berisha, një palaço burrë që me populizmin e tij shan e shpif lart e poshtë, kurse zyrtarisht me shkrim thotë të vërtetën: rruga Levan- Tepelenë s’ka mbaruar vetëm për shkak të qëllimeve politike të tij, urrejtjes ndaj Jugut dhe paaftësisë totale, veshur me korrupsion!” Është një denoncim që e fillon me fjalët: “Ju pata thënë që Berisha është “burrë i poshtër”, “batakçi”!”

E.G.