Biznes okult me mbrojtjen, nën komandën e Berishës junior. Denoncim i një shoferi në Amb. Amerikane

Një vit më parë, shoferi i Drejtorit të Uzinës së Mjekësit në Elbasan, Daniel Karanxha, i quajtur Ndriçim Ashiku, i ka dërguar një raport denoncues ambasadës amerikane në Tiranë, përmes të cilit denoncon një rrjet të tërë (mafioz, është epiteti që përdoret) me në krye ish- ministrin e Mbrojtjes Arben Imami. Raporti ka rënë në dorë të gazetës Dita, që e ka botuar në numrin e sotëm. Në material theksohet se fijet e këtij rrjeti i tërheq biri i Sali Berishës, Shkëlzeni. Ashiku thotë se e ka denoncuar në kryeministri këtë skandal, por ka marrë kërcënime me jetë ai dhe familja e tij. Po në ç’drejtim funksiononte ky rreth? Sigurisht, në atë të shitjes së lëndëve plasëse dhe të gjithë materialeve të uzinës ushtarake, njëfarë Gërdeci i dytë, këtë herë nën drejtimin dhe mbikqyrjen direkte shtetërore. Ja pjesë nga raporti:

“Drejtori ishte një mik i ngushtë i Arben Imamit, por edhe mik me Flamur Kuçin, që punon në kryeministri dhe njeri i afërt i drejtorit të Klik Ekspo Klik, L. Muhametaj, i cili merret me shitjen e të gjitha lëndëve plasëse dhe municioneve të uzinës. Drejtori është gjithashtu një njeri i besuar i Ndriçim Berishës, drejtor i privatizimeve në Ministrinë e Mbrojtjes, kushëri i Sali Berishës. Pas këtij takimi në kryeministri, u bëra të ditur personave që më pritën se do i drejtohesha edhe ambasadës tuaj dhe që do i denoncoja të gjitha. Pas këtij takimi më vjen një kërcënim i hapur nga deputeti i PD-së në zonën e Peqinit, Dashnor Sula”. Dhe në zbardhjen e mekanizmit të fitimeve, Ashiku përmend edhe shefin e sotëm të shtabit të FA-së dhe shpjegon se:

“Nga baza logjistike ku komandant ishte gjeneral Gjunkshi, në çdo poligon vendosen njerëzit e tyre, ku bëjnë furnizime me kamionë të municioneve. Por në të vërtetë, që në ngarkesën e tyre në tunele, bëjnë seleksionimin e municioneve me metale me ngjyra dhe pa ngjyra, në fishekë bronzi, në predha me unaza bakri dhe këto grumbullohen në uzinë për demontim me shkrirje dhe për shitje municioni jashtë vendit. Kurse metali i shkrirë shitet nga uzina si skrap i thjeshtë me çmimin 340 lekë të vjetra, por në të vërtetë bakri dhe bronzi kanë një çmim real prej 6.7 mijë lekë të vjetra”. Emri i Berishës junior del në momentet kur ky dërgonte biznesmenë të huaj me rekomandimin e tij, për të “diskutuar” me drejtorin e uzinës.

a.k