Bill Nye: Besoni se njerëzimin e ka krijuar Zoti? Ok, po mbajini larg fëmijët nga besimi juaj

Amerikanët “hanë bukë veç” në shumë drejtime. Fjala vjen, shumë vetëve mund t’iu duket e pabesueshme, por gati një në dy amerikanë (saktësisht 46%) është kreacionist, dmth njeri që beson se ka qenë Zoti që ka krijuar njeriun në formën e tij të sotme nja 10 mijë mijë vjet më parë, jo më herët. Nëpër shkolla mësohet teoria e evolucionit (vetëm në Tennessee dhe në Louisiana mësuesve u njihet e drejta të kritikojnë teorinë evolucioniste e të propagandojnë teorinë kreacioniste), por fëmijët dëgjojnë lidhur me këtë temë dhe nga të rriturit, prindër e të afërm.

Bill Nye, shkencëtar, por edhe personalitet televiziv i njohur për shkak të një programi me titull "Bill Nye the Science Guy", që synon edukimin shkencor të audiencës, është i shqetësuar nga ky fakt. Për këtë arsye, ai ka bërë një video me titull "Creationism Is Not Appropriate for Children – Nuk është mirë t’u mësojmë fëmijëve kreacionizmin", të cilën e ka hedhur në You Tube, dhe brenda disa ditësh, nga e enjtja deri dje, kjo video është parë nga  1.3 milionë vetë.  Aty ai u thotë të rriturve: “Doni të jetoni me idenë se njerëzimi është krijuar nga Zoti? Ok, besojeni këtë, por lërini fëmijët rehat, mbajini larg besimit tuaj. Ne jemi një vend i njohur për forcën tonë inovative, por ky dyshim i përhapur publik në konceptin shkencor të evolucionit, sipas të cilit qeniet njerëzore dhe të gjitha format e tjera të të jetës janë zhvilluar në vijim të një procesi të mutacionit gjenetik e të seleksionit natyral, e komprometon këtë forcë tonën; ky dyshim do të na lërë pas.”

E.G.