Beteja e Totozanit në mbështetje të romëve dhe keqkuptimet e ca e cave

“Kam ardhur të takoj bashkëqytetarët e mi. Jetojnë në kushte vërtet të vështira, janë kategoria më e përjashtuar, janë jashtë sistemit tonë social. Ne do të bëjmë rekomandime legjislative që të bëhen pjesë e sistemit tonë social, që të kenë mundësi strehimi, arsimimi, punësimi, që të regjistrohen. Nuk ka qytetarë të dorës së parë dhe të dytë, të gjithë duhet të përfitojnë nga mundësitë ekzistuese”- është shprehur Avokati i Popullit gjatë një takimi me komunitetin rom në Tiranën e Re, pranë pallatit me shigjeta.

Nuk është hera e parë që Totozani e bën këtë gjë, duke u pasuar nga reagime të lloj-lloj-shme, mes të cilave të bien në sy ata që thonë, se “Totozani duhet të merret jo vetëm me romët, por edhe me një pjesë të bardhësh putativë, që kanë probleme po aq sa romët”. Me këtë vëzhgimin e fundit del në shesh një keqkuptim i madh. Hallet e romëve janë hallet e një kategorie, e për shkak të përkatësisë në këtë kategori, e prandaj solidariteti me ta nuk ka pse ngatërrohet me solidaritetin me individë të caktuar, që vuajnë për shkak të abuzimeve apo mosfunksionimit të strukturave të pushtetit. Nuk ka dyshim që duhet ngritur zëri edhe në këtë rastin e fundit, fort madje, por duhet të dallojmë nga njëra anë keqtrajtimin metodik të disave (romëve) prej sistemit e nga ana tjetër problemet sporadike të disave (të bardhëve putativë) që vuajnë papërsosmëritë e sistemit, që kanë ngritur ata vetë.

M. Nano