Berisha strukturave: Mos na e kompromentoni procesin e zgjedhjes së pasardhësit tim

Dita ditës shtohen zërat mes demokratëve, që kërkojnë një katarsis real brenda PD-së dhe ekspozimin e të gjitha difekteve që sollën humbjen; i fundit ishte ish kreu i komisionit parlamentar të Sigurisë Leonard Demi. Por ndërkohë që gara brendapartiake për kryetarin e ri mbyllet për 10 ditë, kryetarin në detyrë Berisha e ka shqetësuar perceptimi i përgjithshëm se pasardhësi i tij dihet tashmë, dhe zgjedhjet aktuale janë thjesht procedurë. Ndaj Berisha ka dërguar këtë mesazh për gjithë strukturat e partisë, me hyrjen: Mesazh tejet i rëndësishëm për shpërndarje të menjëhershme për kryetaret dhe sekretarët e PD-së së rretheve dhe grupseksioneve të Tiranës. Ja mesazhi:

“Gara për liderin e ri të PD-së në tërësi po ecën shumë mirë dhe për këtë keni urimet e mia më të mira. Por gjatë ditëve të fundit nga informacione të sigurta nga baza janë identifikuar disa raste zyrtaresh të administratës dhe ndonjë partiak që në kundërshtim të hapur me udhëzimin tim kanë: 1- bërë fushatë të hapur për kandidatin e preferuar, 2- ka pasur ndonjë rast që në sharlatanizëm të plotë kanë folur pa asnjë autorizim në emër edhe të drejtuesve të tjerë kryesorë të PD-së. Ndaj tyre janë marrë të gjitha vendimet që meritojnë. Ju kërkoj që të mos lejoni asnjë njeri të abuzojë me procesin tonë transparent. Përgjegjësinë, të drejtën dhe besimin e plotë për organizimin e procesit në territorin e degës/grupseksionit tuaj e keni vetëm ju!

Përshëndetje, Kryetari në detyrë i PD-së, Sali Berisha”

A.K